नेपालभाषा एकेडेमिं ताःई न्हयवंनिसें सांस्कृतिक ज्ञानकोश दयेकेगु ताःतुंगु खः । थ्व छगू तसकं तःजिगु व महत्वपूर्ण ज्या खः । थुकियात थीथी यक्व श्रोतत चूलाकेमाःगु दु । व कथं थीथी विषयगत लागाया विद्वान व विज्ञपिंत स्वापू तयेमाःगु दु । थ्व धयागु हलंपुलं (चांचूगु) ज्या खः हे मखु । तसकं थाकूगु, झ्यातूगु ज्या खः । नेपालभाषा एकेडेमियाके थःगु हे आर्थिक स्रोत दुगु नं मखु । भचाभचा खर्चं गाइगु ज्या नं मखु । अथे जूगुलिं ताःई न्ह्यवंनिसें थुकिया अवधारणा एकेडेमिं तया वयाच्वंगु खःसां ज्या न्ह्याके मफयाच्वंगु जुल । थज्याःगु तःजिगु व झ्यातूगु साहसिक ज्या यायेत एकेदेमिया भाइस चान्सलर भाजु मल्ल के सुन्दरजुं क्वातुक्क आँट यात । येँ महानगरपालिका व नेपालभाषा एकेडेमि दथुइ छगू सम्झौता जुल । व हे सम्झौता दुने च्वनाः ज्या यायेगु क्वःजित ।
एकेदेमि थेंज्याःगु छगू देय्या गौरव दुगु संस्थायात संघीय सरकारपाखें छुं न छुं कोष दयेका बीमाःगु खः । थुकिया निंतिं तःक्वःमछि पहल जूगु नं दु । तर नेपाली भाषाया एकेदेमि छगूयात जक कोष दयेकाः आर्थिक स्रोत चूलाके बियाच्वंगु खनेदु । प्राज्ञिकसंस्था नेपालभाषा एकेडेमियात नं नेपाली भाषाया एकेडेमियात थें कोष दयेकाबीमाःगु ताया । थ्व संस्था नीस्वंगु ई नं स्वीदँ थ्यने धुंकल, स्वंगू दशक पुलां जुइधुंकल । भाषा, साहित्य व संस्कृतिया ख्यलय् तःताजि ज्या न्ह्याका नं वयाच्वंगु दु ।
थुगु सांस्कृतिक ज्ञानकोशया ज्या न्ह्याकेगु झ्वलय् नेपालभाषा एकेडेमिया दुजः सदस्यपिनिगु धिसिलाःगु ज्यासनामि पुचः दयेकल । ज्ञानकोश निर्माण यायेगु ज्याय् संस्थागत व्यवस्थापन एकेडेमिं याना वयाच्वंगु खः । मनूत न्ह्याक्व सःस्यू बुद्धिजीवि विज्ञविद्वान जूसां नं मनू हे खः । मनूया व्यवहार व स्वभावया पूर्व जानकारी (ज्ञान) सुयाकें दइमखु । तःक्वःमछि सम्बन्धित विषयया लागाया विज्ञ पुचःतय्गु मुँज्या च्वनाः सहलह ब्याकल । विषयगत लागाया च्वसु च्वयाबीगु भाखा नं बिल । अथे खयाः नं च्वसु मुंकेगु ज्या आपालं थाकुयावन । थ्व हुनिं निदँया दुने क्वचायेकेमाःगु ज्ञानकोशया सफू इलय् पूवंकेमफुगु जुल । आः वयाः गुलि नं च्वसुत मुनेफत उ लि हे पिकायेमाःगु बाध्यता दत । छाय्धाःसा संशोधित ई चैत लाया दुने फुइगु जुल । न्हयागुसां सफू पिदनीगु जुल । बांलात । मगाःमचाः गुलि दइ जुइ व लिपाया प्रकाशनय् दुथ्याकेगु जुइ । सकल संवद्ध विद्वानविज्ञ च्वमि भाजु मय्जुपिंत यक्व सुभाय् व भिंतुना दु ।
यज्ञरत्न धाख्वाः
कुलपति, नेपालभाषा एकेडेमि