Category: भाषा, लिपि व साहित्य

ग्यानापुगु छेँ उपन्यासकार राज साय्‌मिया स्वंगूगु नेपालभाषाया जासुसी उपन्यास खः । न्हूजः गुथिपाखें ने.सं ११३२ य् पिदंगु थ्व उपन्यास उपन्यासकार साय्‌मिया जासुसी उपन्यास च्वयेगु पलाःया निरन्तरता खः । थ्व उपन्यासय् नं कौतुलता जिज्ञासा दनी कथं कथानकया योजना यानाः मती हे मतःकथं घटनाया रहस्योघाटन यानाः पाठकपिंत मनोरञ्जन बीगु ज्या जूगु दु ।

ग्व गुबलय् दुनावइ थें जिगु छेँ नेपालभाषाया नांदंम्ह बाखं च्वमि भूषण प्रसाद श्रेष्ठया च्वसां पिदंगु न्हय्गूगु न्हूबाखं व चिबाखं पुचः खः । ल्याय्‌म्ह पुचः पाखें ने.सं ११०१ य् प्रकाशित जूगु थ्व ग्व गुबलय् दुनावइ थें जिगु छेँ झिंन्यापु न्हूबाखंया नापं चिबाखंया संग्रह खः । तीक्ष्ण अनुभूतिं फूचाःगु, व्यंगात्मक विम्वात्मक व सुत्रात्मक शैलीं प्रस्तुत यानातःगु थ्व संग्रहय् दुथ्याःगु बाखनं पाठकया मन जक मखु मस्तिष्कयात नं क्रियाशील जुइकेब्यूगु दु ।

ग्वः फय् नेपाभाषाया नांजाःम्ह च्वमि भूषणप्रसाद श्रेष्ठया च्वसां पिदंगु निगूगु न्हू बाखं/चिबाखं पुचः खः । शारदाभक्त श्रेष्ठ व शैलेन्द्रलाल सुवालपिंसं ने.सं १०९४ स म्हपुजाया लसताय् पिकयादीगु थ्व ग्वः फय् बाखं संग्रह दुने ग्वः फय् बाखं नापं यानाः झिंनिपु बाखं दुथ्यानाच्वंगु दु । कवितात्मक अभिव्यक्ति जनताया शक्ति प्रति विश्वास परिवर्तन प्रति आस्था थ्व संग्रहया विशेषता खः ।

ग्वय्दां व मेमेगु छधाः प्याखं सफू नांजाःम्ह भाषा न्ह्यलुवाः व च्वमि पद्मरत्न तुलाधरं च्वयादीगु झिंस्वपु छधाः प्याखंया संग्रह खः । थुकी दुथ्याःगु प्याखं पद्मरत्नं थीथी इलय् गबलें थीथी कार्यक्रमया निंतिं दबुली क्यनेतसा गबलें पत्रपत्रिकाय् पितबीत च्वयातःगु प्याखं खः । थुकियात हे छथाय् मुनाः ने.सं ११३८ य् च्वसापासां छधाः प्याखं संग्रहया रुपय् पिकयाब्यूगु खः। छधाः प्याखं मुनाय् मां व काय, मचापिनि खँ, सकलें ख्वय्माः, कलाःयात ह्ययेकीम्ह मिजं, प्यम्ह तःकेहेँ, म्हयाय्‌या जातः, ग्वय्दां, धकिं पिनेया मनूत, वैंशया हू, स्वांया पुन्हि न्ह्यः कुन्हु, थन म्वायेत वँय् जुइमाः, न्हूसतकं षडयन्त्र छगू संयोगया प्याखं दुथ्यानाच्वंगु दु ।

बद्री वेदनाया थुगु ग्वय्‌स्वां च्वमिया निगूगु हाइकु सफू कथं ने.सं. ११२६ कौलागा चतुदर्शि कुन्हु कुतः पिकाकःपाखे पिदंगु खः । खुइप्यपु हाइकु दुथ्यागु थ्व हाइकु संग्रहय् मनूतय्‌सं भोगे यानाच्वंगु दुःखयात प्रकृतिया थीथी विम्व छ्यलाः न्ह्यब्वयातःगु दु । नेतातय्‌सं बियाच्वंगु दुःख, मतिनाय् मि च्यानाच्वंगु दुःख, समाजय् सुख शान्ति मदयाच्वंगु दुःख थथे थीथी परिवेशया दृश्य न्ह्यब्वयातःगु थ्व हाइकु संग्रह बोधगम्य जुयाः सौन्दर्यमय जू ।