Category: भाषा, लिपि व साहित्य

नातिबज्रया जीवनया दुवातय् नांया मुक्तक सफू ने.सं. १११३ श्रीपञ्चमी कुन्हु पिदंगु खः । थुकी दुथ्यानाच्वंगु पीच्याकू मुक्तकया भावत अप्वः धयाथें जीवन लिसे स्वानाच्वंगु खनेदु ।

रामशरण महर्जनया जीवनया ब्वनासाइ हाइकु सफू ने.सं. ११३७ य् हलिं नेवाः गुथि गःछेँ कचापाखें पिदंगु खः । थुकी मुक्कं ५३१ पु हाइकु दुथ्याकातःगु दु । सफू दुने समाजय् जुयाच्वंगु वा थःम्हं खनाच्वंगु, भोगे यानाच्वंगु स्थिति, नेतातय्‌गु घच्चाइपुसेच्वंगु नीति, उमिगु हुनिं जनतां फयेमालाच्वंगु दुःख प्वंकातःगु दु । जब सुं प्रति विश्वास मदइ, ला व लुसि थें मिलय् जूपिं नं बाया वनीगु अवस्था लिसें जीवन प्रति घाट–प्रतिघाटया बाखंत, संस्कृति, परम्परा प्रति व्यञ्जनापूर्ण अभिव्यक्ति प्वंकातःगु दु ।

सौरभ शाक्यया कलमं पिज्वःगु जीवनया सवाः गजल सफू ने.सं. ११४२ चिल्लाथ्व पुन्हि कुन्हु कुतः पिकाकःपाखें पिदंगु खः । थुकी मुक्कं सछिपु थीथी विषयया गजल न्ह्यब्वयातःगु दु । थुपिं गजल दुने– देशप्रेम, वर्तमान अवस्थाया बेथिति, सामाजिक विसंगति, मतिनाय् समर्पणया भाव, अव्यवस्थित राजनीतिक अवस्था प्रति विरोधया सः, मांदेय् व मां भाय्‌प्रति अगाध स्नेहया भाब दुथ्यानाच्वंगु दु ।

स्वनिगलं पिनें पिदंपिं नेपालभाषाया भाषिक अभियन्तापिं मध्ये भाजु जीवेश्वर लाखे नं छम्ह खः । वय्‌कःया जन्म बि.सं.१९९४ य् यलय् जूगु खः । लिपा वय्‌कः थाय्‌बाय् हिलाः बिराटनगरय् च्वं झाल ।

वय्‌कःया मांया नां सूर्यलक्ष्मी व बाःया नां जीतलाल लाखे खः । नेवाःतय् उत्थानय् वय्‌कः सदां सक्रिय जुयादी । नेवाः देय् दबू नीस्वनेगु ज्याय् नं वय्‌कःया ज्वःमदुगु योगदान दु । वय्‌कः आवद्ध जुयादीगु संघसंस्था थुकथं दु – झी पुचः विराटनगर (संरक्षक), महेन्द्र मोरङ कलेज (सह–प्राध्यापक), दिग्दर्शन साप्ताहिक (प्रधान सम्पादक) व मेमेगु संघसंस्था । वय्‌कःया कृति– राजनीतिक शास्त्र : एक परिचय (सह लेखन) व मेमेगु यक्व च्वसु ।

विमल ताम्राकारया च्वसां पिज्वःगु जीस्वां ने.सं. १११३ य् कुतः पिकाकःया लुखां पिदंगु खः । मुक्कं पीखुपु हाइकु दुथ्यानाच्वंगु थ्व सफुलिइ थीथी विषयया हाइकु दु । गथेकि – प्रकृति व संस्कृति, मतिना व विछोड, पित्याः व स्याःचाःया लिसें झिझांमिझां दनाच्वंगु बाखंया हाइकुत दुथ्यानाच्वंगु दु ।