Category: भाषा, लिपि व साहित्य

थायभु निबन्ध सफू तारादेवी तुलाधरं च्वयादिगु खः । ने.सं. ११३१ य् पिहांवःगु थ्व सफू छुसिंस्यारं पिथंगु खः । च्वमिं नेवाः समाजया सांस्कृतिक विशिष्टता कथं थीथी धार्मिक/सामाजिक ज्याखँय् छ्यला वयाच्वनागु नसाज्वलंया ब्वघासा तयेगु विधि न्हू पुस्तायात त्वःताथके फःसा थःगु अनुभव ज्यावइगु अले नखः पुजा यायेत नं ग्वाहालि जुइगु तायेकाः थ्व सफू च्वयादीगु खः । थ्व सफुलिइ बुसांनिसें सीइधुंकाः तक उदाय्‌तसें यानावयाच्वंगु हरेक ज्याझ्वलय् छ्यलावयाच्वंगु थीथी ब्व घासाात, थाय्‌भु, सिइबलय् यायमाःगु विधि, लप्तेया नमुना, ब्वय् तयेगु घासाता दयेकेगु तरिका आदिया बारे विस्तृत वर्णया बियातःगु दु ।

थाय्‌भु चित्तधर हृदयया झिपु बाखं मुनातःगु सफू खः । थ्व सफू हर्षरत्न तुलाधर असं हिगाःपाखें ने.सं. १०७८ स पिदंगु खः । थ्व सफू बाखं च्वये सयाः नं बाखं मच्वसें च्वंपिंत बाखं च्वकेबीत पिथनागु खँ च्वमिं न्ह्यथनादीगु दु । थुकी द्यःपाःलाः थेंजयःगु सामाजिक बाखंया लिसें कैलाशकूट भवन नांगु छपु व सामाजिक पृष्ठभूमिइ प्रताप मल्लया खँ न्ह्यथनातःगु प्रतापया प्रताप नांगु ऐतिहासिक खँ नं दुथ्याकातःगु बाखं दु । बाखंया माध्यमं उगु इलय्‌या वस्तुस्थितियात नं ब्वयेगु ज्या थुगु बाखनय् जूगु दु । थुकिं थुगु बाखं छगू ऐतिहासिक दस्तावेजया रूपय् नं महत्वं जाःगु दु । नेपाल ऋतुपतिइ पिहांवःगु खिचा नांगु छपु व धर्मोदयय् पिहांवःगु कैलाशकूट भवन नापं निपु बाखं थुकी ल्ह्ययातःगु बाखं खः । थुगु सफूया निगूगु संस्करण धाःसा ने.सं. ११०१ य् च्वमि स्वयं हे पिकाकः जुयाः पिथनादिल । नेपालभाषाया बाखं साहित्यय् थुगु बाखं पुचःया बिस्कं हे महत्व दु ।