Category: भाषा, लिपि व साहित्य

थौंया कविता विधा जीवन पलाः च्वमि डा. आनन्द जोशीया सफू नेपाल संबत् ११३३ य् कुतः पिकाकःया प्रकाशनय् पिदंगु खः । थ्व सफुलिइ थौंया हाइकु, थौंया कविता, कविताया विषयय् समिक्षा व च्वमिनापया अन्तर्वाता समावेश जुयाच्वंगु दु।

डा. आनन्द जोशीया च्वसां पिज्वःगु थुगु थौंया कविता विधा जीवन्त पलाः सफू ने.सं. ११३३ सिल्लाथ्व १५ कुन्हु कुतः पिकाकः पाखे पिथंगु खः । थुकी दुने विविध विषययात कयाः च्वयातःगु हाइकु बाहेक खुगू देशयापिं हाईजिनपिनिगु खुपु व नेपाःयापिं निम्हेसिगु निपु हाइकु बारे खँ न्ह्यथनातःगु दु । अथेहे विकासया लँय् न्ह्याः वनाच्वंपिं न्हूपिं प्यम्ह हाइजिनपिनिगु प्यपु हाइकुया बारे छुंछुं खँ न्ह्यथनातःगु दु । लिसें थीथी हाइजिनपिंसं च्वयातःगु हाइकुयाबारे विश्लेषण यानातःगु हाइकुत नं न्ह्यब्वयातःगु दु ।

डा. आनन्द जोशीया च्वसां पिज्वःगु थुगु थौंया हाइकु विकास यात्रा व दिशा बोध नांगु हाइकुया बारे समालोचना यानातःगु सफू ने.सं. ११४३ य् रुवरिक येँ व कुतः पिकाकःपाखें मंकाः कथं पिथंगु खः । थ्व सफू नेपालभाषाया हाइजिनपिंसं इलय् ब्यलय् च्वयातःगु थीथी विषयया हाइकुयात कयाः समालोचना यानातःगु सफू खः । थुकी आत्मीय स्वापू दुने लानाच्वंगु गुपु, कोरोना विषय दुने लानाच्वंगु झिंगुपु, विज्ञान व प्रविधिया थीथी पक्ष व प्रभाव विषय दुने दुथ्यानाच्वंगु नीपु व मेमेगु थीथी विषय दुनेया झिंन्यापु हाइकुयात दुवालाः समालोचना यानातःगु दु ।