Category: भाषा, लिपि व साहित्य

दांया धर्म मनूया कर्म श्याम चित्रकारं च्वयादीगु मुक्तक मुना खः । थुगु मुक्तक सफू ने.सं. १११८ यंलाथ्व २ कुन्हु साहित्यया मूलुखा पाखें पिदंगु खः । थुकी मुक्कं १०३ पु मुक्तक दुथ्याकातःगु दु । थुकी गुलि नं भाव न्ह्यब्वयातःगु दु फुक्कं हे दांलिसे स्वानाच्वंगु दु । थौंया इलय् दां चक्रवर्ती जुयाच्वंगु दु धयागु खँ न्ह्यथनातःगु दु । गथे— मनू भिंम्ह याइगु व मभिंम्ह याइगु थ्व हे दामं, मनू राष्ट्रपति जुइगु व फ्वगिं जुइगु थ्व हे दामं, मनूया घरवार व जिन्दगी चले जुइगु व मजुइगु थ्व हे दामं, दां दु सकलें दु, दां मदु सुं हे मदु, छुं हे मदु आदि आदि ।

बखतबहादुर कवि योगवीर सिंहया समकालीन खयां नं थ्वय्‌कःया काव्य परम्परा भक्ति प्रवृत्ति पाखे क्वसाःगु दु । नेपालभाषां चिनादीगु थ्वय्‌कःया न्हय्पु म्ये फुक्क धयाथें आत्मआलोचना, आत्मनिवेदन कथंयागु जूगु दु । मायान केनकाव तल रे जगत है मैजु ज्ञानी छि जिके वःसा थामे याये कूल आदि थ्वय्‌कःया लोकंह्वाःगु म्येँ खः । बक्रोक्ति अभिव्यक्ति थ्वय्‌कःया जक मखु तत्कालीन कविपिनिगु हे छगू कथं शैलीगत विशेषता जूगु दु ।

दासिवःम्ह मनू नेपालभाषाया नांजाःम्ह बाखं च्वमि भूषण प्रसाद श्रेष्ठया च्वसां पिदंगु च्यागूगु न्हूबाखं /चिबाखं पुचः खः । ल्याय्‌म्ह पुचः पाखें ने.सं ११०४ य् प्रकाशित जूगु थ्व दासिवःम्ह मनू झिंन्यापु न्हूबाखंया नापं चिबाखंया संग्रह खः । थ्व संग्रहय् दुथ्याःगु बाखंया मू विशेषता थौंया विसंगति ब्यथिति प्रति तिक्ष्ण व्यंग्य खः । भूषणजुं थौंया हिलावंगु अवस्था विशेष नाप सीधासाधापिं मनूत भ्यलय् पुनत थाकुयाच्वंगु असामाजिक प्रवृतियात ब्वयेगु यानादीगु दु । दिग्पाल गणेशोपाख्यान दिग्पाल गणेशोपाख्यान पूधाः प्याखं जुजु रणजित मल्लं च्वयादीगु खः । थुगु प्याखंयात विमल ताम्राकारं मुनाः कुतः पिकाकःपाखें ने.सं. ११२१ चौलागा २० कुन्हु पिदंगु खः । प्याखनय् झिम्ह गणेशपिं सिद्धिगणेश, ज्वाला गणेश, हर्ता गणेश, धूम गणेश, पद्मगणेश, शुभ गणेश, विद्या गणेश, तेज गणेश, उद्ध गणेश, अधगणेशपिनिगु वर्णन दु ।