Category: भाषा, लिपि व साहित्य

स्वनिगलं पिनें पिदंपिं नेपालभाषाया भाषिक अभियन्तापिं मध्ये भाजु स्व. देवेन्द्रकुमार मल्ल नं छम्ह खः । वय्‌कःया जन्म बि.सं.१९९४ सालय् धनकुटाय् जूगु खः । वय्‌कः लिपा जक बिराटनगरय् च्वं झाःगु खः । वय्‌कःया मांया नां पवित्र कुमारी व बाःया नां गजेन्द्रबहादुर प्रधानांग खः । वय्‌कः आवद्ध संस्था थुकथं जुल – झी पुचः विराटनगर (संरक्षक), नेपाल क्षयरोग निवारण संघ, मोरङ (न्हापायाम्ह नायः) व मेमेगु संघसंस्था । वय्‌कःया कृति – मेरो सेरोफेरो (संस्मरण), भुवन मल्लको वंशावली व मेमेगु यक्व च्वसु ।

दोभान दया खड्गी बेचैनया प्यंगूगु हाइकु मुना सफू खः । ने.सं. ११२८ य् प्रकाशक थः हे जुयाः पिथनादीगु थुगु सफुलिइ पीप्यपु हाइकु दुथ्यानाच्वंगु दु । थ्व सफू खस भासं नं भावानुवाद जुयाच्वंगु दु । थुकी संघर्षया दथुइ म्वानाच्वंग जिन्दगीया बाखं दु । थः यःम्ह मदयाः जिन्दगी छटपटि जुयाच्वंगु बाखं दु । देशय् शान्तगु लकस मदुगु, अले गनं आशाया जः खंकाच्वंगु दृश्य नं दु ।

थ्व दोलखा भाषिका व छुं सफूया च्वमि भाजु इन्द्र माली खः । थ्व सफू चीभाः प्रकाशन पाखें ने.सं.१०९९ य् पिदंगु खः । थ्व सफुलिइ थकाली व उमिगु भाय्, छन्तेल व उमिगु भाय्, चेपांग व उमिगु भाय्, भाय्‌या वर्गीकरणया आधार, नेपालभाषा सार्वनामिक भाषा खःला ? व दोलखा भाषिका यानाः खुपु भाषा सम्बन्धि च्वसु दुथ्यानाच्वंगु दु ।

द्वंका नं तये मजिउगु पलाः सफू भाजु रेवेन्तलाल श्रेष्ठं च्वयादीगु बाखं मुना खः । पलिस्था, येँ नं ने.सं. ११३३ य् पिथंगु थ्व सफुलिइ १४ पु बाखं दु । सफुलिइ पीपु पौ दु ।

द्वंगु पलाः नेपालभाषाया मिसाबाखं च्वमि व एफ.एम् संचालिका मय्‌जु मिना वज्राचार्यया न्हूबाखं संग्रह खः । न्हू हिसु पुचः यल पाखें ने.सं ११२८ य् पिदंगु थ्व संग्रहय् झिंखुपु बाखं दुथ्यानाच्वंगु दु । थथे झिंखुपु बाखं मध्ये द्वंगु पलाः नं छपु बाखं खः । थ्व हे बाखंया नामं थ्व बाखं संग्रहया नां नं द्वंगु पलाः तयातःगु खः। समाजय् न्हिंन्हिं जुयाच्वंगु घटना व समस्यायात कयाः च्वयातःगु बाखं दुथ्याना च्वंगु थ्व सफू छगू सामाजिक यथार्थवादी बाखं पुचः खः ।