नचुयावंपिं मनूत उपन्यासकार, कवि, कलाकार भाजु जगदीश चित्रकारया निगूगु उपन्यास खः । थ्व उपन्यास ने.सं.११२४ कछलाय् अर्थ पिथना प्रकाशन प्रा.लिपाखें पिदंगु खः । नेपालभाषाया उपन्यासया धलखय् थ्व छगू न्ह्यथनेबहःगु उपन्यास खः । सात सालया क्रान्ति न्ह्यःनिसें थौंतकया घटनाक्रमयात नानीछोरि नांयाम्ह छम्ह निम्नवर्गीय मिसाया जीवनलिसे स्वाकाः ब्वयातःगु दु । सलंसः दँनिसें पिनेया संसारपाखें अलग च्वनाः खिउँलय् ब्वलना वयाच्वंगु नेपाःया संस्कार, संस्कृति, रीतिरिवाज, मानमर्यादा, आचार विचार, नीति नैतिकता, आदर्श दर्शन नापं सम्पूर्ण थःगु पहःयागु जीवन शैली व सभ्यता फुक्कं (स्थानीय पहःयागु हे छाय् मजुइब्यु) न्हूगु धाःगु, आधुनिक धाःगु हिउपालं हय्काःवयाः न्हिथं ह्रासोन्मुख जुजुं वयाच्वंगुयात थ्व उपन्यासय् न्ह्यब्वयातःगु दु । विश्वया नांजाःपिं उपन्यासकारतय्सं छ्यलावंगु उपन्यासया थासायात हे छ्यलाः उगु हे थासाय् दुने च्वनाः च्वयातःगु थ्व उपन्यासय् तसकं सरल व स्वाभाविक भाषा छ्यलातःगु दु ।