Category: भाषा, लिपि व साहित्य

महाकवि गिरिजाप्रसादं च्वयादीगु थ्व उपन्यास बुँख्याःचा कुतः पिकाकःया लुखां ने.सं. ११३२ य् पिदंगु खः । थ्व उपन्यासय् अतृप्त यौनयात मचायेक कुलातःगु दु ।

विमल ताम्राकारया थुगु बुँख्याचा हाइकु संग्रह ने.सं. ११३४ बछलाथ्व १५ कुन्हु कुतः पिकाकः पाखें पिदंगु खः । थुगु सफुलिह सच्छिपु हाइकु दुथ्याकातःगु दु । थुकी बुँख्याचित विम्बया रूपय् छ्यलातःगु दु । जनता बुख्याचा खनाः ग्यानाच्वनेमाःपिं जीवया अवस्थाय् म्वानाच्वने माःगु दु, गन नेतात बुँख्याचाया रुपय् दनाच्वंगु दु । नेपाः देय्‌या थौंया राजनीति परिवेश बुँख्याचातय्‌गु ल्हातय् लानाच्वंगु यथार्थ ब्वयातःगु दु ।

बुद्धाचार्य शाक्यं च्वादीगु सफू बुंगद्यः छगू अनुसन्धात्मक शोध निबन्ध खः । ने.सं ११२४ य् पूर्णचन्द्र शाक्यं पिकाकःया भूमिका निर्वाह यानाः पिथनादीगु थ्व सफुलिइ दुथ्यागु दक्व च्वसुत बुंगद्यःया झिनिदँया मेलाया लसताया झ्वलय् सन्ध्या टाइम्स पत्रिकाय् छसिकथं निक्व व प्रेष्टिज नेपालय् छक्व पिहांवयेधुंकूगु दु । थुकी बुंगद्यःया बारे ध्वाथुइक च्वयातःगु दु । थ्व सफू ब्वने धुंकाः बुंगद्यःया विषयय् मस्यु, मसःगु व मथूगु खँ सिकेफइ ।

बुंगाःचा धर्मराज राजकर्णिकारया च्वसां पिज्वःगु ने.सं. ११३९ य् पिदंगु हाइकु संग्रह खः । थुगु सफू दुने– जिन्दगीया स्याःचाः, प्रेम–ममता, भ्वखाय्‌या पीडा, राजनीतिं ब्वलनाच्वंगु पीडा, आज्जुइ थ्यंके मफयाच्वंगु पीडा, सांस्कृतिक चित्रण लिसें कवि चित्तधरयात लुमंकाः च्वयातःगु हाइकु दुथ्यानाच्वंगु दु ।

बुंगाःचा : थी थी दृष्टि नांगु थ्व समालोचना मुना सफूया सम्पादक भाजु नारद वज्राचार्य खः । ने.सं. ११४३ कौलाथ्व पारु कुन्हु देगः म्हिचा सफूया स्वीच्यागू प्रकाशनया रुपय् पिदंगु खः थ्व सफू । थ्व सफुलिइ हाइजिन भाजु धर्मराज राजकर्णिकारया हाइकु सफू बुंगाःचायात कयाः झिंन्हय्‌म्ह नेपालभाषा व खस् नेपाली भाषाय् च्वयादीपिं समालोचक, समीक्षकपिंसं यानादीगु समालोचना दुथ्यानाच्वंगु दु ।

स्वनिगलं पिने पाल्पाय् च्वनाः मदिक्क नेपालभाषाया सेवा यानादीम्ह भाजु चिनियालाल बज्राचार्य थ्व उपन्यासया उपन्यासकार खः । ने.सं.१११५ य् पलेस्वां पिथनाया लुखां थ्व उपन्यास प्रकाशन जूगु खः । उपन्यासकार भाजु चिनियालाल वज्राचार्यं थ्व सिबय् न्ह्यः नसंचा नांगु उपन्यास नं च्वयादीगु दु । थ्व बुँबाली उपन्यास गांया जनजीवनयात लिधंसा दयेकाः च्वयातःगु छगू प्रगतिवादी उपन्यास खः । थुकी गांया अशिक्षित, निर्धा, व सोझापिं मनूतय्‌त छपुचः धूर्त शोषकतय्‌सं गुकथं शोषण याना वयाच्वंगु दु धयागुया बांलाःगु चित्रण दु ।