Category: भाषा, लिपि व साहित्य

मय्‌जु मिलन शाक्यया जन्म अबु बुद्धिराज शाक्य तथा मां वीरमाया शाक्यया कोखं ने.सं १०९६ थिंलाथ्व ११य् यल महानगरपालिकाय् जूगु खः । थःगु विद्यार्थीकालं निसें भाषा साहित्य ख्यलय् संलग्न जुयादीम्ह वय्‌कःया न्हापां पिदंगु छम्हु आकाश मुक्तक मुना सफुलिइ पिदंगु राजनीति नांगु मुक्तक खः । लिपा नेपाल कमर्श क्याम्पस स्वनिगः साहित्य पालाया ज्यासना पुचःया दुजः जुयाः च्वसा न्ह्याकेगु जक मखु नेपालभाषा परिषद, विराट साहित्य सम्मेलन, बाखं दबू आदिं न्ह्याकूगु थीथी भाषिक साहित्यिक गतिविधि नं ब्वति कायेगु यानादिल । साहित्य लेखनय् च्वखँ, चिनाखँ, मुक्तक, बाखं, हाइकु, आदिया नापं अनुसन्धानात्मक च्वसुत च्वयादीम्ह मय्‌जु मिलनया पिदंगु सफू खः — झी पत्रिका दुने मिसाच्वमिया धलः (११३२), सुथया खसु (हाइकु मुना/११३२)।

थुपिं सफू बाहेक वय्‌कःया अभिलेख सम्पादन सम्बन्धि कृतित नं पिदंगु दु । गथे— सम्यक् तिथि गुथि, हःखा प्याक्लां खलः–११३८ (ताडपत्र, ताम्रपत्र व भ्वंपौ मुक्कं याना ६४ पा भावार्थ सहित अभिलेख सम्पादन), स्वप्न परीक्षा (अभिलेख/११३४) आदि । अथेहे कुलां, ह्याँउवाला, सन्ध्या टाइम्स, लाय्‌कु, नलि, लुमन्ती दबू, शाक्य समाज, थौंकन्हय्, मतिना आदि पत्रपत्रिकाय् नं वय्‌कःया तःपु हे निबन्ध, हाइकु, मुक्तक बाखं पिदंगु दु । मय्‌जु मिलनया थज्याःगु ज्याया कदर स्वरुप वय्‌कःयात– विराट साहित्य सम्मेलन गुथिपाखें बाखनय् सिरपाः (ने.सं. ११२६), नेपालभाषा केन्द्रीय विभागपाखें तारा लाकौल सिरपा (ने.सं. ११३० ) तथा नेपालभाषा एकेदमि पाखें रामहरिकृष्ण अनुसन्धान वृत्त सिरपाः (ने.सं. ११३०), लुम्बिनी विश्वविद्यालय व हाइकु ख्यः पाखें नेवाः बौद्ध हाइकु विधाय् उत्कृष्ट सिरपाः (११४३) प्राप्त जूगु दु ।

बाखं च्वमि भाजु रत्नबहादुर साय्‌मिजुया न्हापांगु उपन्यास खः– मिलाखों । थ्व उपन्यास पासा मुना, असं भोताहिति पाखें ने.सं. १०८७ इ पिहां वःगु खः । चीमि जुइगु धयागु नं सराः हे खः । चीमि जूगु हे कारणं यक्वसिया बाखं अथें फुलस्टप जुयाः क्वचाइ । जीवन न्ह्याये न्ह्यः हे सिधइ । थ्व उपन्यासय् थुजाःगु हे खँ दु ।

मिलापू उपन्यासकार राज साय्‌मिया नेपालभाषां पिदंगु न्हय्‌गूूगु उपन्यास खः । च्वसापासा कुलांभुलु येँपाखें ने.सं ११४१ य् पिदंगु थ्व उपन्यास राज साय्‌मिया आःतक पिदंगु उपन्यास मध्ये दकलय् लिपांगु जक मखुसे न्हापा न्हापाया उपन्यास स्वयाः पाःगु छम्ह व्यक्तित्वया जीवनय् आधारित सामाजिक उपन्यास खः । झिंन्हय्‌गू द्याय् ब्वथलातःगु थ्व उपन्यासय् मनूया जीवनय् न्ह्यागुं नं इलय् न्ह्यागु नं घटना दुर्घटना जुइफु तर हारे मचासे व नाप सामना यानाः थःगु शोकयात नं शक्तीया रुपय् हीकाः सिर्जनाया स्वां ह्वयेकादीम्ह व्यक्तिया जीवनपाखें प्रेरणा कायेगु तातुना च्वयातःगु उपन्यास खः ।