Category: भाषा, लिपि व साहित्य

नेपालभाषा साहित्यय् विधागत रुपय् उपन्यासया कथं वःगु न्हापांगु सफू मिसा खः । थ्व उपन्यासया च्वमि उपन्यासकार धुस्वां साय्‌मि खः । ने.सं.१०७४ य् थ्व उपन्यास च्वसापासां प्रकाशन याःगु खः । थ्व उपन्यासं नेपालभाषाया साहित्यय् छगू न्हूगु लुखा चायेकाबिल । थ्व उपन्यास नेपालभाषा साहित्यय् बिधागत रुपय् न्हूगु जक मखसे थुकिं ज्वनावःगु शैली नं न्हूगु ढंग हे जूगु दु । लिपा वनाः उपन्यासकार झीगु भाषा ख्यलय् उपन्यास सम्राटया कथं नांजाल । उपन्यासकारं लिपा च्वःगु गंकी उपन्यास ला अन्तराष्ट्रिय रुपय् बय्‌बय् जुल । विश्वया यक्व भाषं अनुवाद नापं जुल । थ्व उपन्यासया निंतिं उपन्यासकारयात श्रेष्ठ सिरपालं छाय्‌पिउगु खः ।

मिसा नं मनू खः मय्‌जु निजिरोस श्रेष्ठं च्वयादीगु छगू सामाजिक उपन्यास खः । मथुरा साय्‌मि व विजयमान श्रेष्ठ जानाः ने.सं. ११४१ य् पिकाःगु थ्व उपन्यासय् २५ ब्व (अध्याय) दु । वरिष्ठ आख्यानकार मथुराकृष्ण साय्‌मिया आह्वानय् च्वःगु थ्व छगू नारी स्वाभिमानं जाःगु उपन्यास खः । थ्व उपन्यासय् झीगु समाजय् विद्यमान काय् व म्ह्याय् दथुइ याइगु भेदभावया यथार्थ चित्रण दु । म्ह्याय्‌मचां नं मांअबुयात काय्‌मचां मयागु सेवा यायेफु धैगु क्यनेगु ज्या थ्व उपन्यासय् जूगु दु ।

मिसा सु खव निबन्ध सफू बासुपासां च्वयादीगु खः । थौकन्हे प्रकासन विभागं ने.सं. १०७५ य् थ्व सफू पिकाःगु खः । बासुपासाया थ्व सफू वय्‌क:या धापू अनुरुप प्रगतिशील निबन्ध खः ।