Category: भाषा, लिपि व साहित्य

थीथी च्वमिपिंसं प्वंकातःगु बिचाः मुनाया सफू खः– म्हपुजा । नेवाःतय् दकलय् सकलय् तःजिगु नखः कथं काइगु म्हपुजा निबन्ध सफुलिइ च्वखँ मुकांदीम्ह सत्यमोहन जोशी खः । ने.सं १११९ य् लोकसहित्य परिषद्ं पिथंगु थ्व सफुलिइ म्हपुजाया परिभाषा, म्हपुजाया इतिहास, म्हपुजाया उद्देश्य व दर्शन, म्हपुजाया कर्मकाल निर्णय, म्हपुजा विधि, म्हपुजा–नेवाःतय्‌गु मंकाःगु संस्वृति, म्हपुजा व न्हूदँया भिन्तुना लिसें धलं दनेत मन्दः, म्हपुजाया रहस्य, म्हपुजा व नेवाः म्हसीका, नेवाःतय्‌गु बिस्कंगु विशेषतां जाःगु मंकाःगु नेवाःपहःयागु नखःचखः जात्रा उत्सव थितिरिति व म्हपुजा विषय दु ।

म्हपुजा निबन्ध सफू पत्रकार बुद्धाचार्य शाक्यया सफू खः । पिकाकः ओलम्पस क्लबपाखें ने.सं १११७ न्हूदँ, म्हपुजा दिनस थ्व सफू पिदंगु खः । ओलम्पिक क्लबं नेवाः एकताया चिं म्हपुजाया विधि हने मसःपिं व म्हपुजाया विशेषतां जाःगु खँ मसियावंपिं नेवाःतय्‌गु निंतिं म्हपुजाया विविध पक्ष थुइकेत थ्व सफू पिकाःगु खः ।

म्हपुजा विधि सफू सुवर्ण शाक्यं च्वयादीगु खः । ने.सं. ११२३ य् पिदंगु थ्व सफूया पिकाकः ओलम्पस क्लब खः । नेवाःतय् राष्ट्रिय नखःकथं कनावयाच्वंगु म्हपुजा विधि ल्वः मनावंगुलिं भावी सन्ततिया निंतिं म्हपुजाविधि छगू लिखितरुपय् दःसा जिउ धैगु मनंतुनाः थ्व सफू पिहांवःगु खनेदु ।

यज्ञमानपति बज्राचार्यं मुंकादीगु व मणिसिंह महाविहारपाखें ने.सं. ११२४ य् पिहांवःगु थ्व सफूया तातुना नेवाःमितय्‌सं म्हपूजा विधि पूवंक हनाः उकिया महत्व बृद्धि जुइमा धैगु खः । थुकी यक्व म्हपुजा यायेबलय् पूवंकेमाःगु पूजा विधिया वाक्यत न्ह्यथनातःगु दु ।