सविना श्रेष्ठया च्वसां पिज्वःगु जिन्दगी छगू न्ह्यसः चिं व मनया स्पर्श चिनाखँ सफू ने.सं. ११४२ य् नेपालभाषा फाउण्डेशनपाखें पिदंगु खः । सफूया नां कथं थुगु सफुलिइ निगू ब्व दु । न्हापांगु ब्वय् ५८ पु चिनाखँ दुसा मेगु ब्वय् ५५ पु चिनाखँ दुथ्याकातःगु दु । थीथी विषयया ११३ पु चिनाखँ दुने जीवनया असंगति खायुगु सत्य व अनुभूतिया लबूयात थियाः नुगःयात ह्ययेकेत स्वयाच्वंगु खनेदु । जीवनया अनेक भोगाइत, समाजय् खनेदयाच्वंगु अनेक किपात क्यानभासया चित्र थें ब्वयातःगु दु । जीवन मतिना, अस्तित्वया खोज यानाच्वंगु दु । चिनाखँ दुने समाजय् खनेदुगु थीथी किपां यानाः थः अलमल जुयाच्वंगु दु । उकिं धाथेंगु छु खः धकाः न्ह्यसः तयाच्वंगु दु ।