तिकिनंगु मि मयजु प्रतिसरा साय्मिं च्वयादीगु स्वीन्यापु चिनाखँया संग्रह खः । नेपालभाषा मिसा खलः येँपाखें ने.सं.११२१ गुँलागा कृष्णाष्टमि कुन्हु पिदंगु थ्व चिनाखँ मुना सफू थीथी साहित्यिक ज्याझ्वः व पत्रपत्रिकाय् पिदंगु कविताया संग्रह खः । ने.सं.११३०य् श्रेष्ठ सिरपालं छायेप्यूगु थुगु कृतिं नेपालभाषाया आधुनिक कविताया ख्यलय् वय्क:या वैचारिक लागा व सशक्त अनुभूति तब्याना वनाच्वंगु छुमां क्यनाब्यूगु दु । मिखां पिज्वइगु ख्वबि तिकि ननीबलय् न्हापां अवश्य क्वाइ, लिपा बुलुहुँ ख्वाउँया वनी । तर थुकी तिकिनना च्वंगु कविताया ख्वबि कने मज्यूगु बाखं, हाले मज्यूगु म्येँ थें चुइँचुइँ पुयाः ब्वँमिपिनिगु नुगलय् छाप त्वःतेत सफल जुइ फइगु थुगु संग्रहया विशेषता खः ।