निकचा निरञ्जन रत्न शाक्यया स्वपु व अमीररत्न ताम्राकारया स्वपु यानाः खुपु बाखं दुगु सामाजिक बाखंया संग्रह खः । ११० पौ ल्याः दुगु थ्व सफू लुमन्ति खलः, प्यूखां ने.सं. १०९६ य् पिथंगु खः । समाजय् खनेदुगु संगति, विसंगति थुगु बाखं सफूया विषयवस्तु खनेदु । चीमि जि– जिगु बलात्कार, शंकाय् दुनाच्वंम्ह मिसा व छगू द्वन्द्व जि दुने यानाः स्वपु बाखं निरञ्जन रत्न शाक्यं च्वयादीगु व मां दे, मचाम्ह भरिया व लाखा व दां यानाः स्वपु बाखं अमीररत्न ताम्राकारं च्वयादीगु खः । साहित्य, संस्कृतिया विकास यायेगु ताःतुनाः नीस्वंगु लुमन्ति खलःया प्यंगूगु पलाः कथं थ्व सफू पिथनेगु ज्या जूगु खः धकाः पिकाकःया धापू थ्व सफुलिइ न्ह्यथनातःगु दु ।