नेवाः व नेवाः लोक साहित्य सत्यमोहन जोशीया च्वखँ मुना खः । वाङ्मय शताब्दी पुरुष जोशीया च्वखँ मुनेगु ज्या मदन सेन वज्राचार्यं यानादीगु खः । ने.सं. १११४ य् सत्यमोहन जोशी हनेज्या ग्वसाः खलः पाखें पिदंगु थ्व सफुलिइ जोशीया थीथी पत्रिपत्रिकाय् पिहां वयेधुंकूगु व पिमदंनीगु च्वसु संग्रहित जुयाच्वंगु दु । थ्व सफुलिइ मुक्कं झिंच्यापु च्वसू दुथ्याःगु दु । जोशीया च्वसु बिना सम्पादन गथे खः अथेहे दुथ्याःगु धाःगु दु । पिन्यादँ न्ह्यःनिसेंया च्वसु दुगु जूगुलिं थ्व अवधिया शैलीया अध्ययन यायेत नं थ्व सफू महत्वपूर्ण जू ।