नेवाः समाजय् द्यःला सफूया च्वमि भाजु राजनलाल (रास) जोशी खः । थ्व द्यःला समाजयात दुग्यय्क अध्ययन यानाः च्वयातःगु अनुसन्धानात्मक सफू खः । थ्व सफू समाजशास्त्र, नृतत्वशास्त्र विधाय् लाः । थ्व सफूया प्रकाशक सोसाइटी फर नेवार स्टडिज खः । ने.सं.११३५ स थ्व सफू पिदंगु खः । द्यःलातय्सं नेवाः नखःचखः थःगु हे बिस्कं पहलं हनी । इमिगु इहिपाः यायेगु संस्कार मेमेगु जातिसिबय् पाः । उमि इहि, बाह्रा व ज्याथः जंक्व यायेम्वाः । सीबलय् सीम्ह जिलाजं नं कुबिइ । न्हापा न्हापा उमिसं मेमेगु जातिं मयाइगु चःबि ईगु, बँ पुइगु, सी उइत पँया सामान दयेकेगु आदि ज्या याइ । थज्याःगु बिस्कं विशेषतां जाःगु छगू जातिया संस्कृति लिपा न्हना मवनेमा धकाः भाजु राजनलाल जोशीं खोजमूलक रुपं अध्ययन यानाः पिथनादीगु थ्व सफूया बिशेष महत्व दु । नेवाःतय् दत्थुइ द्यःला समाजया सांस्कृतिक, भाषिक, ऐतिहासिक महत्व छु गुलि दु ? धयागु खँ थ्व सफुलिइ उल्लेख दु । लिसें थौंकन्हय् प्रचलनय् दुगु व मदुगु परम्परायात न्ह्यथनाः राज्यया निंतिं द्यःलातय्सं यानावयाच्वंगु योगदानया बिषय नं चर्चा परीचर्चा यानातःगु दु ।