प्रतिक्रिया नेपालभाषा व नेपाली भाषाया नांजाःम्ह च्वमि व इतिहासकार चित्तरञ्जन नेपालीं च्वयादीगु ३८ गद्य कविताया संग्रह खः । ने.सं १०७८ य् श्रेष्ठ प्रकाशन पाखें पिदंगु थ्व सफुलिइ समालोचक माधवलाल कर्माचार्य व धुस्वां साय्मिपिनिगु प्रतिक्रिया नं भूमिकाया रुपय् दुथ्याकातःगु दु । नाद सौन्दर्य स्वयाः नं भाव सौन्दर्ययात थाय् बियातःगु थ्व संग्रहय् कविं तत्कालिन मूल्य मान्यताप्रति छगू व्यंग्य व न्ह्यसः थनाः थःगु स्वतन्त्र अभिव्यक्ति बियातःगु जक मखु छन्द मात्राया बन्धनं मुक्त यानाः गद्यभाषं नं कविता चिनेज्यू धैगु क्यनातःगु दु । थुकथं नेपालभाषाया काव्य ख्यलय् गद्यलसं कविता चिनेगु परम्पराया शुरुवात थ्व प्रतिक्रिया काव्यं यानाब्यूगु दु । नेपालभाषाया काव्य ख्यलय् थुकियात छगू न्हूगु दुतिना धकाः मधासे मगाः ।