प्रतिबिम्ब मय्जु अपर्णा प्रधानं च्वयादीगु समालोचना मुना सफू खः । थ्व सफूया पिकाकः कुतः पिकाकः खः । ने.सं. ११४२ य् पिदंगु थ्व सफुलिइ न्याम्ह चिबाखंमिया खुगू चिबाखं सफू, च्याम्ह बाखं च्वमिया गुंगू बाखं सफू, निम्ह उपन्यासकारया स्वंगू उपन्यास, निम्ह निबन्धकारया स्वंगू निबन्ध सफू व छगू समालोचना यानाः नीनिगू सफू व लुँध्वाखा स्वलापौया प्यंगू ल्याःया (११९–१२२ तक) प्यम्ह मिसाच्वमिपिनिगु प्यंगू बाखं चिबाखं नापं यानाः जम्मा नीखुगू सफूया ब्याख्यात्मक समालोचना दुथ्याःगु दु । थ्व प्रतिबिम्ब सफुलिइ नेपालय् दुपिं तःम्ह नेपालभाषाया साहित्यकारपिनिगु थीथी विधाया कृति जक मखु विदेशय् च्वनादीपिं साहित्यकारपिनिगु कृति अर्थात डायस्पोरियन साहित्ययागु नं समालोचना दुथ्याः । थुकथं थ्व सफू तःम्ह मछि च्वमिपिनिगु तःगू मछि थीथी सफूयात कयाः छम्ह हे समालोचकं छगू हे सफुलिइ यानातःगु नेपालभाषाया न्हापांगु व्यावहारिक समालोचनाया सफू जूगु दु ।