भूषणप्रसाद श्रेष्ठया गजल मुना ब्वःम्ह लाप्चा ने.स. ११३७ गुंलाथ्व १० य् ल्याय्म्ह पुचः प्रकाशनपाखें पिदंगु खः । थुकी वय्कलं दकलय् न्हापां च्वयादीगु म्ये निसें ने.सं. ११३७ कौलागा दुने च्वयादीगु थीथी म्येचाकय् पिदनेधुकूगु म्ये/गजल व म्येचाकय् मलाःनिगु लय तयेल्यंदनिगु नापं यानाः न्हय्न्हय्पु रचना दुथ्याकातःगु दु । थुगु सफुलिइ दुथ्याःगु फुक्क धयाथें गजल मतिना सम्बन्धी जूगु दु । फलत फुक्क धयाथें गजल श्रृंगारिकतां भय्बियाच्वंगु दु । गजलकार थः यःम्ह मतिनामिलिसे निम्ह छम्ह थें च्वंंक म्वायेत लालायित जुयाच्वंगु दु ।