ईश्वरीमैंया श्रेष्ठया च्वसां पिज्वःगु मुखू मब्यंनीगु स्वां हाइकु मुना सफू ने.सं. ११२८ दँ थिंलागा नवमि कुन्हु कुतः पिकाकः ख्वपपाखें पिदंगु खः । थुकी १५० पु थीथी विषयया हाइकु दुथ्यानाच्वंगु दु । गथेकि देय् व जनताया लागि जीवन बलिदान बियाच्वंपिं शहीदतय्गु हिं न्याय फ्वनाच्वंगु दु । जनतायात जुयाच्वंगु अन्याः अत्याः समाजय् ब्वलनाच्वंगु विकृति, विसंगति, देशय् जुइमाःगु हिउपाः मवयाः देय् ख्वयाच्वंगु अवस्था खनाः हीमी चायाच्वंगु अवस्था लिसें स्रष्टायात लुमंकाः थःगु अभिव्यक्ति प्वंकातःगु हाइकु दु ।