वसन्त चौधरीया च्वसां पिज्वःगु वसन्त नांया चिनाखँ सफू सुरेश किरणं भाय्हिलाः (अनुदित) यानाः वि.सं. २०७३ चैतय् लुनकरणदास गंगादेवी चौधरी साहित्य कला मन्दिरया ग्वाहालिं सांग्रीला बुक्सपाखें पिथंगु खः । थुकी थीथी विषयया ६० पु चिनाखँ दुथ्यानाच्वंगु दु । कविता दुने सादा जीवन उच्च विचारया भाव प्वंकातःगु दु । अले थःगु देश शहरयात महिताःतय्सं क्वात्तुक्वानाच्वंगु दृश्य खनाः नुगः हिइकाच्वंगु दृश्य दु ।
देय् न्ह्याकाच्वंपिं सारथीतय्सं मखुथाय् यंकाः देय्या रथ स्यंकाच्वंगु खनाः नुगलय् घाः लाःगु आभास यानाच्वंगु दु । लिसें मतिनाया रोमानी भावया आपालं चिनाखँ लिसें देय्यात जुयाच्वंगु घाः नं ब्वयातःगु दु । अले चिनाखँ दुने अन्यौलया बाखं माःहनाः निरन्तर यात्रा न्ह्याकाच्वंगु नं खनेदइ ।