काहा विशेष यानाः यलय् त्यपय् (व्यञ्जनकार), ज्यापु (महर्जन) व खुसः (तण्डुकार) जातियापिन्सं पुइगु चलन दु । व थेंतुं न्हापा ख्वपया साःक्वलां, गोमारी, तेखाच्व व तापालाछि त्वाःया मानन्धरतय्सं (साय्मि) काहा पुइगु खः ।
नवदुर्गा द्यःगणया थीथी ज्याझ्वलय् मदयेकं मगाःगु काहा थौंकन्हय् गोमारि त्वाःया मानन्धरतय्सं जकं पुयाच्वंगु दनि । यलया थेच्वय् नं ज्यापु व गथु समुदाययापिन्सं काहा पुइगु याना वयाच्वंगु दु । बुंगय् काहा पुइपिं महर्जन, गथु व देसार जातियापिं खः । किपुलिइ बाघ भैरव प्याखनय् च्वनीपिं गथुतय्सं व झिंनिदँया प्याखं लाइबलय् तण्डुकारतय्सं काहा पुइगु खः । येँय् काहा पुइपिन्त काहाब्वःजा धायेगु चलन दु । थुपिं न्हापा अनया भिंद्यःत्वाःपाखे च्वनीपिं खःसां आः येँय् काहा पुइपिं मदये धुंकल ।