येँ महानगरपालिका अले नेपालमण्डलया मूलवासी नेवाःतय्गु कला, संस्कृति व सम्पदा तसकं तःजि व तःमि । नेवाः कला, संस्कृति व सम्पदायात हे नेपाल देशया संस्कृति व सम्पदाकथं राष्ट्रिय व अन्तर्राष्ट्रिय जगतय् ब्वयाच्वंगु दु । येँ महानगरपालिकाया जननिर्वाचित नेतृत्व पुचलं कला, संस्कृति, सम्पदा व स्थानीय मौलिक परम्पराया समग्र संरक्षण व सम्वर्द्धन यायेगु ज्यायात थःगु महत्वपूर्ण व प्राथमिक दायित्वकथं वोध यानाः थीथी परियोजना न्ह्याकाच्वनागु दु । नेपाल राष्ट्रया हे गौरवकथं धस्वानाच्वंगु नेवाः कला, संस्कृति व सम्पदाया संरक्षण व सम्वर्द्धनया निंतिं येँ महानगरपालिकापाखें नेपालभाषा एकेडेमिलिसे सहकार्य यानाः तसकं महत्वपूर्ण नेवाः सांस्कृतिक ज्ञानकोश ग्रन्थ पिथनेत ताःलाःगु दु ।
थुगु ज्ञानकोशय् नेवाः संस्कृति, सम्पदा, नखःचखः, परम्परा, कलाकृति आदिया विविध ज्ञान व सूचना बृहत् व व्यापककथं कघानातःगु दु । येँ महानगरपालिका अझ नेपाल देशया हे मौलिक सम्पदा व संस्कृति संरक्षण यायेगु ज्याय् थ्व नेवाः सांस्कृतिक ज्ञानकोशं तिबः बी धयागु भलसा कयाच्वना । थ्व ज्ञानकोश नेपाःया संस्कृति, सम्पदा, सभ्यता व इतिहास अध्ययन याइपिन्त व न्हूगु पुस्तायात ज्ञानसिप हस्तान्तरण यायेत महत्वपूर्ण ग्रन्थकथं ज्याख्यले वइ ।
येँ महानगरपालिका व प्राज्ञिक संस्था नेपालभाषा एकेडेमिया सहकार्यय् थुगु महत्वपूर्ण व तःजिगु गौरवया परियोजना सफल जूगु दु । थुगु सांस्कृतिक ज्ञानकोश दयेकेगु गौरवया परियोजना ताःलाकेत जानादीपिं सकल विज्ञ व विद्वत्वर्गयात येँ महानगरपालिका परिवार व सम्पदा व पर्यटन समितिपाखें विशेष सुभाय् व कृतज्ञता देछायाच्वना ।
आशामान संगत
संयोजक
सम्पदा तथा पर्यटन समिति
येँ महानगरपालिका
कमलादि, येँ ।