नेपालया संस्कृतिया पर्याय हे नेपालमण्डलया संस्कृति बाय् नेवाः संस्कृति खः । तसकं तब्यागु इतिहास व परम्परा दुगु थुगु नेवाः संस्कृति उतिकं हे तःजि । उकिं थ्व नेपाः देय्यागु हे गौरव अले म्हसीकाया आधार जूगु दु । नेवाः संस्कृति, सम्पदा, कला सम्बन्धी छगू सूचनामूलक बृहत् ग्रन्थया रुपय् नेवाः सांस्कृतिक ज्ञानकोश संग्रहित जूगु धयागु तसकं महत्वपूर्ण ज्या खः । नेपालभाषा एकेडेमि थें ज्याःगु प्राज्ञिक व आधिकारीक संस्थाया नेतृत्वय् विविधता व व्यापकता कय्च्यानाः थुगु नेवाः सांस्कृतिक ज्ञानकोश दयेकेफूगु तसकं लसताया खँ खः । येँ महानगरपालिका व नेपालभाषा एकेडेमि दथुइ सहकार्य यानाः थुगु महत्त्वपूर्ण ज्या सफलतापूर्वक ताःलाकाः थुगु ज्ञानकोश ग्रन्थ छिकपिनिगु ल्हातय् थ्यंकेफत, थुकी येँ महानगरपालिका, सम्पदा व पर्यटन विभागं गर्व महशुस यानागु दु ।
येँ महानगरपालिकां कला, संस्कृति र सम्पदा संरक्षण व सम्वर्द्धन यायेगु ज्यायात गौरवया परियोजनाकथं नालाकयागु दु । थुगु नेवाः सांस्कृतिक ज्ञानकोश नं येँ महानगरपालिकाया छगू मूवंगु व महत्वपूर्ण गौरवया परियोजना खः । थुगु गरिमामय गौरवया परियोजना पूवंकेगु ज्याय् दुथ्याःपिं सकसित येँ महानगरपालिका, सम्पदा व पर्यटन विभागपाखें विशेष सुभाय् देछाया ।
कुमारी राई
प्रमुख
सम्पदा तथा पर्यटन विभाग
येँ महानगरपालिका
कमलादि, येँ ।