द्यः ल्हाये धुनेवं न्ह्याः, गुँ थायेन्ह्यः थाइगु धिमय्या बोल च्वः/छुवां खः ।
माथंवंगु लँय् प्याखंपाः कयाः तिं तिं न्हुयाः तःक्वः लिसा कयाः थायेज्यूगु धिमय् बोलयात गुँ धाइ ।
धिमय् थायेगु तःताजि बोल दु । गथेकि द्यः ल्हायेगु, लँपो, तँपो, धुँन्यापो, मंगलपो, साँया पो, माँ तनेगु आदि । थुपिं गुलिं बोलत विशेष थासय् व इलय् जक थाये ज्यूसा गुलिं न्ह्याबलें नं थाये ज्यू । गथेकि धुँन्या हीकेत थाइगु धुँन्या पो, लँय् वनीबलय् थाइगु लँ पो, सायाःबलय् थाइगु साँयाःपो, धिमय् च्वः, परताल (प्रताल), पलेमां आदि थीथी तालय् थाइगु खः ।
ख्वपय् धिमय् बोलयात द्यः ल्हायेगु, च्वः/छुवां, न्ह्याः, गुँ, माः आदि थीथी ब्वथलातःगु दु ।
च्वाम्वःसाया सँ । चिहाकयेक चानाः पुइँचा लाक चिनातइ । ताःहाकः चिहाकः जुइ । छेँक च्वंकातइ । धुँन्याया च्वकाय् क्वातुक चिनाः धुँन्या हीकीम्हंं खने दयेकातइ ।
कुछि कुत्याया चारपाते यानाः सि मुलाः सुयातःगु कापः । थयायंके माःगु गुथि भ्वय् नयेबलय् रुमाल चकंकाः उकी द्यःने लप्ते लानाः भ्वय् तयेगु याइ ।
तग्वःगु धिमे, दकलय् अप्वः सःम्हेसित थाकीगु धिमे । पुजा याइबलय् दकलय् च्वय् तयाः न्हापालाक थुकियात निं पुज्याइ । धिमे क्वकाइबलय् नं थुगुपती न्हापां क्वकायेगु याइ ।
धिमे स्यनेज्या बच्छि क्वचायेकाः याइगु पुजा । स्यनेज्या ताःलाः ला मलाः ला मुल्यांकन याइ । त्वाः खलःपिं व पुलांसिमिपिं नं दक्वं थ्याकी । बहनी भ्वय् नइ ।
न्हूस्यमि मस्तय्त स्यनाच्वंगु धिमे धुँन्या स्यनेज्या क्वचायेके । पिदनीबलय् नासःद्यःयात पुजा याइ । मोहनि सिन्हः तिकी । वःलाः सपना लाये धुंकूपिं त्वाःया दक्वं काय्मस्त पिदने पुजाय् थ्याकी ।
वःलाः सपना लानाः धिमे व धुँन्या सयेकः वःपिं मस्त । त्वाः खलःया कय्तापुजा याये धुंकूपिं काय्मस्त जुइ । मेगु समुहयात धिमे मस्यंतले थुपिं न्हूस्यमि जुइ ।
गुथिया जःपिं । भुतू खां छम्हसित गुथिया जः मानय् याइ । थुपिं दक्वं गुथि भ्वजय् थ्याइ । गुथिया दक्वं ज्याखँय् भागिदार नं जुइ । पाः फयेमाःगु गुथि जूसा खलःपिसं पालंपाः फइ ।