जाकि, ध्यबा व ग्वःगु ग्वय् तयातःगु सलिं । नासःपुजां कलःया लिसें किसली नं तयायंकी । भाकल यानातःगु पुजा वने लिपा लाइगु अबस्थाय् किसली भागियाकाः तयेगु याइ ।
दक्वं कलःया पुजा छगलय् तये । नासःपुजां न्हूसिमि मस्तसें म्हं छगः तयाहःगु कलः दक्वं कलः ल्हानाः छगलय् जक तयाः द्यः पुज्यायेगु याइ ।
सिंहया स्वरुप वयेक च्वनाः दनीगु माः । मस्त निम्ह पुलिं चुयाः घ्वंस्यानाः च्वनी । इपिं निम्हेसिया दथुइ च्वनाः निपा तुतिं निम्हेसित कताकाः छम्ह मेम्ह दनी ।
भचा पुतुं च्वनाः च्वमेलुयात निखे ब्वहलय् न्हुइकाः हानं बुलुहुं दनी । वयागु ब्वहलय् दनाः च्वमेलुं धुँन्या हीकाः थुगु माः तनी । च्वमेलु क्वकायेत हानं छकः पुतुुं च्वनी । च्वमेलु क्वय् वये धुंकल धायेव स्वम्हसिनं पालंपाः न्ह्यातले धुँन्या हीकेगु याइ ।
माः तनेत दयेकीगु खः । स्वकु स्वकुति पाकाः प्यकुनय् प्यंगः स्वकु प्यकुति हाकःगु थां थनी । थामय् निच्वतय्सं क्वलाछिति क्वय् दुनेपाखे साःह्वः खनातइ । च्वय्या च्वतय् खाँस कयातइ । थुकी प्यखें चिकीचाग्वःगु निनाः प्यंगः दिकाः चुकू तयाः छधी जुइकाः सिपौ लानाः खः दयेकी ।
थामं थांया प्यंगुलिं कवलय् साःह्वतय् साः दुतछ्वयाः क्वं च्वय् क्रस यानाः कवलं निगः निगः सिँ च्वकी । थथे च्वकागु दक्वं सिँ दथुइ खाँस कयाः ल्वाकाः चुकू तइ । च्वकाय् गजू थें दुगु थां छगः दथुइ थनाः सिपौया च्वय् खनेदयेकी । खः दयेत सिँ छगः धंकाः सिपौ लानाः पथं च्वका चिनाः जक नं दयेकेगु याः ।
धुँन्या स्यनीबलय् स्यनीगु छगू माः । सिँ तुतिं चुयाः निम्ह मस्त जँ जँ ल्वाकाः दनी । इमि जवंखवं मेपिं निम्ह मस्त च्वनाः भर बीकाः च्वमेलु च्वय् वनाः सिँ तुतिं चूपिं निम्हसिगु ब्वहलय् निपातुतिं चुयाः धुँन्या हीकी । धुँन्या हीकीबलय् प्यम्हसिनं छ्यं क्वछुकी । च्वमेलु क्वहां वल धायेव प्यम्हसिनं नं पालंपाः धुँन्या हीकी । थुबलय् सिँ तुतिं चूपिन्त म्हं छपु छपु धुँन्या बी । भचा भचा पाक च्वनाः निम्हसिनं धुँन्या हीकी । च्वमेलु च्वय् क्वय् जुइत मेपिन्सं ग्वाहालि याइ ।
सित्यालय् पलाः तयाः दने । कुत्याति हाकःगु त्याच्चा चिंगु सिँ बाकुतिइ च्वय् तुति तये छिंक घात कयाः च्वय्पाखे छत्वाःचा भेसें लुइकाः छानातइ । क्वय् पाचुका तइ । सिँ याउँगु व बल्लाःगु जातया जुइ । घात कयातःथाय् पालि दिकाः निपां तुतिइ त्वान्नाःया पिनेपाखे सिँ लाकाः पत्ति बालां क्वातुक ची । दनेत बः कयाः दनी । दने धुनधायेव पलाः छिनांतुं च्वनेगु याइ । धुँन्या हीकेत नं पलाः छिछ्युं हे हीकी । दनाच्वने माल धायेव धुँन्या तुतां चुइगु याइ ।
सिखः थें यानाः मचा बुयाः तनीगु माः । छम्ह बल्लाःम्ह मनुखं निखे निम्ह मचा बुयाः छ्यनय् चाःहीकाः धुँन्या हीकी । धुँन्या हीकेत त्याःचा चिंक जनी ची । जनीया द्यःने फ्यतुकाः निखे जवंखवं निम्ह मस्त बुइ । मस्तय् तुतिं बूम्हेसित घय्पुइ । छम्हं मेम्हेसिगु ल्हाः ज्वनी । धुँन्या हीकीबलय् मस्तसें थसः पाये थें यानाः छ्यं क्वतछ्वइ । छ्यनय् धुँन्या चाःहीके धुंकाः धिमेया तालय् जवं छकः खवं छकः बँय् थीथे च्वंक धुँन्या क्वःथलाः थनी । क्वःथले सिधल धायेव मस्त क्वकयाः हानं छकः धुँन्या हीकी ।
वःलाः छ्वयेगु पूवने । काय्मस्त बःचा धिकः जुल धायेव वःलाः छ्वइ । थःपिनि इष्टदेवकथं मानय् यानातयाम्ह द्यःपिनिगु तिथि लाकाः उम्ह हे द्यःया थासय् वःलाः छ्वयेगु याइ । सुथ न्हापां छ्वइ । न्हिनय् थःथितिपिन्सं स्वाँनं छुकःवइ । चच्छि अन हे चाहीकाः कन्हय्कुन्हु त्वालं पुजा हयाः द्यः पुज्यानाः समय् नकाः हइ । थथे स्वलितक वःलाः छ्वइ । लिपांगु पतकय् पुरेतयात होम जग्गे यायेगुया लिसें मार छ्वयेकाः पुजा याकी । पुजा सिधयेकाः बारां छुनाः वःलाः सपना लाकी ।
च्वमेलुयात ल्हाती थनाः तनीगु माः । बबलाःपिं निम्ह मस्त दनाः वं वयागु वंयागु ल्हाःया लप्पाय् क्वातुक ज्वनी । तुतिं बल्लाक अखदा काइ । निम्हं भचा क्वछुनाः पुतुं च्वने थें याइ । च्वमेलुयात ज्वनातयागु निखे ल्हाःती निपा तुतिं चुइकी । थथे यानाः चुइकीबलय् निम्हसिगुं ल्हाःतिं भर बी छिनी । बुलुहुँनं दनी । दने धुनेव च्वमेलुं धुँन्या हीकाः माः तनेगु याइ । माः तने क्वचायेकाः निम्हसिनं नं धुँन्या हीकेगु याइ ।
याकःचां जक च्वमेलु ब्वहलय् थनाः दनीगु माः । छम्ह बल्लाःम्ह मचां च्वमेलुयात निखे ब्वहलय् चुइकाः थनी । च्वमेलुं ब्वहलय् दनाः धुँन्या हीकी । थ्व माः तनीबलय् छथाय् जक च्वनी मखु । द्यःयाथाय् जूसा द्यः चाःहिली । मेथाय् जूसा थःपिनिगु लँपुकथं चाःहिलेगु याइ । चाःहिलीबलय् च्वमेलुं ब्वहलय् दनाः धुँन्या धंकाः ज्वनातइ । चाःहिकी धाःसा मखु । चाःहिले गात धायेव हानं छकः धुँन्या हीकाः क्वहांवइ । च्वमेलु क्वहां वल धायेव ब्वहलय् तःम्हेसिनं नं धुँन्या हीकेगु याइ ।