माकःयात बुइगु थें यानाः दनीगु माः । निम्ह भचा तःधीपिं मस्तसें म्हं छम्ह छम्ह मचा ब्वहलय् तयाः तुति निपा निखे यखायेकाः माकः यानाः बुइ । निम्हं जँ जँ ल्वाकाः दनी । इमि जःखः मेपिं निम्ह भर बी थें दनाः छधी जुइकी । च्वमेलु थहां वनाः माकः यानातःपिं निम्ह मस्तय्गु ब्वहलय् निपा तुतिं चुयाः थुगु माः तनाः धुँन्या हीकेगु याइ । च्वमेलु क्वहां वल धायेव माकः यानातयापिं मस्त नं क्वहां वयाः छसिनिसें सकसिनं न्ह्यातले धुँन्या हीकेगु याइ ।
बेताः थें च्वनाः दनीगु माः । मनू छम्ह तुति व ल्हातिं चुयाः बेताः थें च्वनाः थसः पाइ । ल्हातिं चुइत निपां ल्हाः ल्यूने छ्वइ । ल्हाः व तुतिया बलं म्ह बँय् मथीक ल्ह्वनी । वयागु नुगःपा व पुली न्हुयाः च्वमेलुं दनाः धुँन्या हीकाः थुगु माः तनी । न्हुइ न्ह्यः रुमाल लाइ । थहां वनेत ल्हातिं थियाः भागि याइ । च्वमेलुं धुँन्या हीके सिधल धायेव बेताः जूम्हेसिनं दनाः न्ह्यातले धुँन्या हीकाः थुगु माः तने क्वचायेकी ।
बसंवने
मेमेगु त्वालय् वनाः माःतं वने । धिमे पिदनाः नासःद्यइथाय् व इस्तदेवपिन्थाय् माः तने सिधल धायेव मेमेगु त्वालय् बसं वनी । बसं वनेत गुगु त्वालं ब्वन उगु त्वालय् वनेगु याइ । छन्हुं हे निगू स्वंगू त्वालय् नं वने मालेयः । बसं ब्वंगु त्वालं बसं वःपिं दक्वसितं भ्वय् बाय् समय् नकेगु याइ । थःथिति दुगु त्वालय् बसंवःपिं थःथितिपिन्त भ्वय् नकेगु याइ । बसं वने क्वमचाःतले नासः मोहनि लित तइ मखु । क्वचाल धायेव लित तयेगु याइ ।
म्हुतुं पुयाः न्यायेकेगु बाजा । सालुगु सिजः पाता ग्वः मुंकाः दयेकी । च्वकापाखे तपु यानाः म्वाय्लि थें फ्वः वयेकातइ । फ्वःया क्वसं सिजः पातायागु तुल्सिहः बां वःगु स्वहः चिनाः यखाना तइ । मेखे म्हुतु दिकाः पुइ छिंक फ्वःचा पिकया तइ । स्वकुति हाकः जुइ । स्वत्वाः यानाः छुतय् याये जीकातइ । बुत्ता तयाः छाय्पियातइ । कथि छपु पासा तयाः दथुइ छ्वासुक चिनातइ । प्वंगा पुइबलय् छपा ल्हातिं कथि ज्वनाः प्वंगायात भर बियाः धिमेया बोलय् पुइगु याइ ।
नासःद्यःया थाय्या मोहनि सिन्हः । धिमे पिदनीबलय् मू गुरुं तिकीगु मोहनि सिन्हः । मूगुरुं नासःद्यः पुजा यानाः मोहनि सिन्हः फइ । थुकुन्हु वःलाः सपना लाये धुंकूपि त्वाःया काय्मस्त दक्वं थ्याकाः भ्वय् याइ । नासः मोहनि तीधुंकल धायेव न्हूसिमि मस्तय्त धिमे थाकी । धुँन्या दुगु त्वालय् माः तनाः धुँन्या नं हीकेबी । नासः मोहनि तीधुंकाः लित मतःतले मेपिनिगु चिप नयेगु, स्वाहाने हाचां गायेकेगु आदि याये मज्यूगु नियम दु ।
धुँन्या धेचुइकाः बँय् थी थें च्वंकेगु माः । मस्त निम्ह फ्यतुनाः जँ जँ ल्वाकाः कसिक्क च्वनी । च्वमेलुं इपिं निम्हसिगु ब्वहलय् निपा तुतिं चुयाः धुँन्या हीकी । च्वमेलु क्वहां वल धायेव म्हं छपु छपु धुँन्या बी । धिमे बोलया तालय् निम्हसिनं फ्यतुनाःतुं बुलुहुँनं धुँन्या धेचुइकाः बँय् थीथे च्वंकाः हानंं ल्ह्वनी । थथे जवं छकः खवं छकः याइ । बँय् धाःसा थीकी मखु । थथे याये सिधल धायेव दनाः न्ह्यातले धुँन्या हीकेगु याइ ।
झिंनिकु हाकः जुइ, भतीचा तीमा बां लुइ । छपु धुँन्याय् निगू च्वाम्वः दइ । दक्वं त्वालय् छगू हे रंगया च्वाम्वः जुइ मखु । गनं तुयूगु व हाकुगु दइ । गनं तुयूगु व ह्याउँगु तइ । गनं गनं धाःसा तुयू तुयूगु व हाकु हाकुगु नं जुइ । निपुं हाकुगु जूथाय् बाहेक दक्वभनं तुयूगु च्वय् लाइ । च्वं निसें क्वय्यागु च्वाम्वःतक पञ्च रङ्गया झल्लर तयाः कुछि कुछि पाक पताय् ची । घंघला घानातःगु पताय् च्वाम्वः नाप ची । धुँन्याया च्वकाय् संकि तयातइ ।
त्वालं त्वालय् तइगु स्वापूया छगू बिधि । धुँन्या मदुगु त्वालय् झिंनिदँय् छकः वःलाः सपना लाकाः धिमे व प्वंगा स्यनी । स्यनेगु ज्या क्वचायेकाः पिदनाः पुजा सिधल धायेव त्वाःब्याः वनेगु याइ । दक्वं त्वालय् वनी मखु । स्वापू दुदुथाय् जक वनी । त्वाःब्याः वनीबलय् द्यःयागु ख्वाःपाः च्वयातःगु त्यपय् थ्वँ तयाः निम्हसिनं कुबियाः त्वाः खलःपिं दक्वं वनी । तपाः भ्यगतय् समय् तयाः उकी द्यःने मुस्या पालु नं तया यंकेगु याइ । त्वाःब्याः वंपिन्त भ्वय् बाय् समय् नकाहयेगु याइ ।
धुँन्या हीकीबलय् दकलय् च्वय् च्वनाः हीकी । यक्व तःधिकःम्ह याइ मखु । धुँन्या छपु हे ल्ह्वने मफुम्ह नं याइ मखु । धुँन्या ल्ह्वनाः हीकेफुम्ह बःचा धिकःम्हेसित याइ । तुयूगु जामां सिंकी । माः तनीबलय् माः तनीपिं खलःपिनिगु ब्वहलय् दनाः धुँन्या हीकेगु याइ । ब्वहलय् थहां वनेन्ह्यः गुरुयाके आज्ञा कयाः ब्वहलय् तइपिन्त भागि यानाः थहांवनी । थहां वनेत खलःपिन्सं ग्वाहालि याइ । धुँन्या स्यनाः मेम्ह च्वमेलु जूमवःतले नासःपुजां वयात न्यागूगु सी बियातइ ।
पुजा तयेगु थल । लीपातायागु व तिबां थानातःगु यानाः निगू कथंया दइ । च्वं निसें क्वथ्यंक अपाँइचाः यानाः पिचा बां लुइकाः च्वय् पाखेया सि भचा भेसें लुकाः दुसिका तइ । प्यं माथं वनी । लीयागुली च्वय्पाखे चु तयाः ग्वः मुकातइ । तिबांयागुली चिचीचा बालागु तिबां ह्वः मदयेक थानाः प्यंचालं निसें पंबालाया चु तयाः च्वय्पाखे ग्वलाकार यानाः भचा तजाः यानाः ज्वने छिंकातइ । धिमे स्यनीबलय् न्हूसिमि मस्तसें थुकी पुजा तयाः यंकेगु धाइ ।