सिखः थें यानाः मचा बुयाः तनीगु माः । छम्ह बल्लाःम्ह मनुखं निखे निम्ह मचा बुयाः छ्यनय् चाःहीकाः धुँन्या हीकी । धुँन्या हीकेत त्याःचा चिंक जनी ची । जनीया द्यःने फ्यतुकाः निखे जवंखवं निम्ह मस्त बुइ । मस्तय् तुतिं बूम्हेसित घय्पुइ । छम्हं मेम्हेसिगु ल्हाः ज्वनी । धुँन्या हीकीबलय् मस्तसें थसः पाये थें यानाः छ्यं क्वतछ्वइ । छ्यनय् धुँन्या चाःहीके धुंकाः धिमेया तालय् जवं छकः खवं छकः बँय् थीथे च्वंक धुँन्या क्वःथलाः थनी । क्वःथले सिधल धायेव मस्त क्वकयाः हानं छकः धुँन्या हीकी ।
वःलाः छ्वयेगु पूवने । काय्मस्त बःचा धिकः जुल धायेव वःलाः छ्वइ । थःपिनि इष्टदेवकथं मानय् यानातयाम्ह द्यःपिनिगु तिथि लाकाः उम्ह हे द्यःया थासय् वःलाः छ्वयेगु याइ । सुथ न्हापां छ्वइ । न्हिनय् थःथितिपिन्सं स्वाँनं छुकःवइ । चच्छि अन हे चाहीकाः कन्हय्कुन्हु त्वालं पुजा हयाः द्यः पुज्यानाः समय् नकाः हइ । थथे स्वलितक वःलाः छ्वइ । लिपांगु पतकय् पुरेतयात होम जग्गे यायेगुया लिसें मार छ्वयेकाः पुजा याकी । पुजा सिधयेकाः बारां छुनाः वःलाः सपना लाकी ।
च्वमेलुयात ल्हाती थनाः तनीगु माः । बबलाःपिं निम्ह मस्त दनाः वं वयागु वंयागु ल्हाःया लप्पाय् क्वातुक ज्वनी । तुतिं बल्लाक अखदा काइ । निम्हं भचा क्वछुनाः पुतुं च्वने थें याइ । च्वमेलुयात ज्वनातयागु निखे ल्हाःती निपा तुतिं चुइकी । थथे यानाः चुइकीबलय् निम्हसिगुं ल्हाःतिं भर बी छिनी । बुलुहुँनं दनी । दने धुनेव च्वमेलुं धुँन्या हीकाः माः तनेगु याइ । माः तने क्वचायेकाः निम्हसिनं नं धुँन्या हीकेगु याइ ।
याकःचां जक च्वमेलु ब्वहलय् थनाः दनीगु माः । छम्ह बल्लाःम्ह मचां च्वमेलुयात निखे ब्वहलय् चुइकाः थनी । च्वमेलुं ब्वहलय् दनाः धुँन्या हीकी । थ्व माः तनीबलय् छथाय् जक च्वनी मखु । द्यःयाथाय् जूसा द्यः चाःहिली । मेथाय् जूसा थःपिनिगु लँपुकथं चाःहिलेगु याइ । चाःहिलीबलय् च्वमेलुं ब्वहलय् दनाः धुँन्या धंकाः ज्वनातइ । चाःहिकी धाःसा मखु । चाःहिले गात धायेव हानं छकः धुँन्या हीकाः क्वहांवइ । च्वमेलु क्वहां वल धायेव ब्वहलय् तःम्हेसिनं नं धुँन्या हीकेगु याइ ।
माकःयात बुइगु थें यानाः दनीगु माः । निम्ह भचा तःधीपिं मस्तसें म्हं छम्ह छम्ह मचा ब्वहलय् तयाः तुति निपा निखे यखायेकाः माकः यानाः बुइ । निम्हं जँ जँ ल्वाकाः दनी । इमि जःखः मेपिं निम्ह भर बी थें दनाः छधी जुइकी । च्वमेलु थहां वनाः माकः यानातःपिं निम्ह मस्तय्गु ब्वहलय् निपा तुतिं चुयाः थुगु माः तनाः धुँन्या हीकेगु याइ । च्वमेलु क्वहां वल धायेव माकः यानातयापिं मस्त नं क्वहां वयाः छसिनिसें सकसिनं न्ह्यातले धुँन्या हीकेगु याइ ।
बेताः थें च्वनाः दनीगु माः । मनू छम्ह तुति व ल्हातिं चुयाः बेताः थें च्वनाः थसः पाइ । ल्हातिं चुइत निपां ल्हाः ल्यूने छ्वइ । ल्हाः व तुतिया बलं म्ह बँय् मथीक ल्ह्वनी । वयागु नुगःपा व पुली न्हुयाः च्वमेलुं दनाः धुँन्या हीकाः थुगु माः तनी । न्हुइ न्ह्यः रुमाल लाइ । थहां वनेत ल्हातिं थियाः भागि याइ । च्वमेलुं धुँन्या हीके सिधल धायेव बेताः जूम्हेसिनं दनाः न्ह्यातले धुँन्या हीकाः थुगु माः तने क्वचायेकी ।
बसंवने
मेमेगु त्वालय् वनाः माःतं वने । धिमे पिदनाः नासःद्यइथाय् व इस्तदेवपिन्थाय् माः तने सिधल धायेव मेमेगु त्वालय् बसं वनी । बसं वनेत गुगु त्वालं ब्वन उगु त्वालय् वनेगु याइ । छन्हुं हे निगू स्वंगू त्वालय् नं वने मालेयः । बसं ब्वंगु त्वालं बसं वःपिं दक्वसितं भ्वय् बाय् समय् नकेगु याइ । थःथिति दुगु त्वालय् बसंवःपिं थःथितिपिन्त भ्वय् नकेगु याइ । बसं वने क्वमचाःतले नासः मोहनि लित तइ मखु । क्वचाल धायेव लित तयेगु याइ ।
म्हुतुं पुयाः न्यायेकेगु बाजा । सालुगु सिजः पाता ग्वः मुंकाः दयेकी । च्वकापाखे तपु यानाः म्वाय्लि थें फ्वः वयेकातइ । फ्वःया क्वसं सिजः पातायागु तुल्सिहः बां वःगु स्वहः चिनाः यखाना तइ । मेखे म्हुतु दिकाः पुइ छिंक फ्वःचा पिकया तइ । स्वकुति हाकः जुइ । स्वत्वाः यानाः छुतय् याये जीकातइ । बुत्ता तयाः छाय्पियातइ । कथि छपु पासा तयाः दथुइ छ्वासुक चिनातइ । प्वंगा पुइबलय् छपा ल्हातिं कथि ज्वनाः प्वंगायात भर बियाः धिमेया बोलय् पुइगु याइ ।
नासःद्यःया थाय्या मोहनि सिन्हः । धिमे पिदनीबलय् मू गुरुं तिकीगु मोहनि सिन्हः । मूगुरुं नासःद्यः पुजा यानाः मोहनि सिन्हः फइ । थुकुन्हु वःलाः सपना लाये धुंकूपि त्वाःया काय्मस्त दक्वं थ्याकाः भ्वय् याइ । नासः मोहनि तीधुंकल धायेव न्हूसिमि मस्तय्त धिमे थाकी । धुँन्या दुगु त्वालय् माः तनाः धुँन्या नं हीकेबी । नासः मोहनि तीधुंकाः लित मतःतले मेपिनिगु चिप नयेगु, स्वाहाने हाचां गायेकेगु आदि याये मज्यूगु नियम दु ।
धुँन्या धेचुइकाः बँय् थी थें च्वंकेगु माः । मस्त निम्ह फ्यतुनाः जँ जँ ल्वाकाः कसिक्क च्वनी । च्वमेलुं इपिं निम्हसिगु ब्वहलय् निपा तुतिं चुयाः धुँन्या हीकी । च्वमेलु क्वहां वल धायेव म्हं छपु छपु धुँन्या बी । धिमे बोलया तालय् निम्हसिनं फ्यतुनाःतुं बुलुहुँनं धुँन्या धेचुइकाः बँय् थीथे च्वंकाः हानंं ल्ह्वनी । थथे जवं छकः खवं छकः याइ । बँय् धाःसा थीकी मखु । थथे याये सिधल धायेव दनाः न्ह्यातले धुँन्या हीकेगु याइ ।