वज्रयानी पुजाविधि विशेष यानाः चर्या मेया निंतिं सकसिनं म्हस्यूम्ह कर्णहर्ष बज्राचार्यया जन्म ब्रम्हचक्र महाविहार ओमबहालय् मां न्हुच्छेमाया (सक्व) व अबु दानहर्ष बज्राचार्यया कोखं ने.सं. १०३९ सिल्लाथ्वः द्वादसिकुन्हु जूगु खः ।
वय्कलं ओमबहाःया हर्षवीरसिंह बज्राचार्यपाखें प्रारम्भिक शिक्षाया नापं वज्रयानी परम्परागत पुजाविधि व चचामे सयेकादीगु खःसा चर्यानृत्य ऋद्धिमानसिं व पं. गुरु बद्रीरत्न बज्राचार्यपाखें सयेकादीगु खः ।
वय्कलं व अष्टरत्न गुरुजु (जुजुकाजी मखंबहाः)पिन्सं मणिसिंह महाविहार संरक्षण तथा सुधार समिति, जपतुं, मुसुंबहाः, येँया ग्वसालय् ने.सं. १११८ दिल्लाथ्वः गुरुपुन्हिनिसें चचामे स्यनेगु ज्या उगु विहारया नरेन्द्रमुनि बज्राचार्यया सक्रियताय् अनया हे छेँय् जूगु जुल । थथे हे तःथाय् चर्यानृत्य स्यनेज्या यानादीम्ह वय्कलं वि.सं. २०४८ सालं बाल्मीकी विद्यापीठय् बौद्ध कर्मकाण्ड स्यनेगु प्रशिक्षण ज्याझ्वलय् व शिक्षा तथा संस्कृति मन्त्रालय अन्तर्गत स्वलातक चचामेया प्रशिक्षण बीगु ज्या सत्वतारा वज्रया पुलांगु बसपार्कया छेँय् जूगु जुल । थथे हे वय्कः संलग्न दुगु चर्या गुथिपाखें चचाया ख्यलय् तःधंगु हे ज्या जूगु जुल ।
वय्कलं बौद्ध वज्रयानी पुजाकथं पंचशाली, भ्वय् चचा, देपुजा सिलाःगू आदि समस्त पुजाया चचामे हाले सः । चचामे स्यनामिया हुनिं वय्कः बज्राचार्य संरक्षण गुथिया कोषाध्यक्ष, नेपाल महायान बौद्ध धर्म संघया संस्थापक दुजः खः । थ्व नेपालय् जूगु झिंन्याक्वःगु विश्व बौद्ध सम्मेलनया निंतिं नीस्वंगु खः । थथे हे मेमेगु संघसंस्थाय् नं दुथ्याःगु जुल । चचामेया गुरु जूगु हुनिं वय्कःयात हनेकथं हनापौ, दसिपौ, दोसल्ला, चुल्या आदि यक्व हे लःल्हायेगु ज्या जूगु दु । वय्कःयात वि.सं. २०५१ य् महासम्वरया पुजाय् हनेज्या जूगु दु, अथेहे वि.सं. २०५६ सालय् मणिसिंह महाविहार संरक्षण तथा सुधार समितिया दँमुंज्याय् वहःया चुल्या न्ह्याकाः बेतालिं चिकाः, दोसल्लां न्ययेकाः हनेज्या जूगु खः । वि.सं. २०५६ सालय् हे बज्राचार्य संरक्षण गुथिं गीताचार्यया भूमिकायात सम्मान यासें हनापौ द्यछाःगु खः । ने.सं. ११२३ य् वैरोचन तीर्थया सिन्दुरात्मक चक्रपुजाय् गोकुल व चुल्या लःल्हानाः हनेज्या जुल । ने.सं. ११२४ गुरुपुन्हिकुन्हु तेबहाःया चचा सयेकूपिनिपाखें गुरुयात लुँया चुल्या न्ह्याकाः हंगु खः ।