अबु महन्तबज्र बज्राचार्य व मां मुतिमाया बज्राचार्यया कोखं १०८९ कौलाथ्वः अस्तमि, सनिबारखुन्हु यलया नःबहिली जन्म जुयादीम्ह दया बज्राचार्य छम्ह बहुप्रतिभाशाली कलाकार खः । वय्कलं त्रिभुवन विश्वविद्यालयपाखें आईकम तकया शिक्षा कयादीगु दु । थौंकन्हय् वय्कलं हस्तकलाया ज्या याना च्वनादीगु दु । नेवाः जनसांस्कृतिक मंकाः गुथि, इन्द्रेणी सांस्कृतिक समाजय् आबद्ध जुयाः राष्ट्रिय सभा गृह व मेमेगु दबुली थःगु प्रस्तुति बियादी धुंकूम्ह बज्राचार्यं नेसं ११२७ स गुथिया हे प्रकाशनय् पिदंगु ‘बिद्रोहया सः’ सिडि म्येचालय् म्ये हालादीगु दु । नापनापं ‘सवाः’ म्येचालय् नं थ्वय्कलं थःगु सः बियादीगु दु । म्ये हालेगु जक मखु विसं २०५० सालय् त्वाःत्वालय् व गांगामय् न्ह्यब्वःगु ‘खाल्डो’ सडक नाटकय् थ्वय्कलं अभिनय नं यानादीगु दुसा नेसं ११२७ स पिदंगु ‘हिसिदुम्ह मय्जु’ नेवाः भिसिडिइ निर्देशन नापं यानादीगु दु । अधिकार प्राप्तिया आन्दोलनय् नं सक्रिय जुयादीम्ह कलाकार बज्राचार्यं ०६२/०६३ या ऐतिहासिक जनआन्दोलनय् नागरिक समाजया ग्वसालय् न्ह्याःगु तत्कालीन सरकार विरोधी दबुली थःगु सः बियादीगु दु । थुकथं देसय् जुयाच्वंगु अन्याय व अत्याचारया विरोधय् थःगु कलाकारिता छ्यलाच्वंम्ह थ्वय्कलं नेवाः कलाख्यःयात नं तब्या यायेगु निंतिं लिपांगु इलय् वयाः ‘संगीत प्रवाह’या ज्याझ्वलय् थःगु प्रस्तुति बियाः सक्रिय भूमिका म्हिता च्वनादीगु दु ।