भारा छियेगु प्रयोजनया निंतिं छेदिइ वा काँथलय् चा न्हुयेगु चलन दु । चा न्हुयेत बँय् चा प्यमपुने मा धइगु ल्याखं न्हापां द्वँनौ अर्थात् भारा उयाःलिं वःगु नौ बँय् ह्वली । वयां लिपा चा पाँचा लिकयाः न्हापां त्यथां दाइ । पाँय् पाँय्गु चा वा धिक्का धिक्कागु चायात त्यथां दायेवं उगु चा लिपा छपाँय् जुयाः सालुया वनी ।
चकनेवं उकी तुतिं न्हुइ । तुतिं न्हुयाः सालुके धुंकाः उकियात कुचाकुचा यानाः वा छपाँय् यानाः जूसां मरि तुले थें तुलाकाइ । तुलीबलय् नं छखे छखे यानाः तुल धाःसा तुले अःपुइ । अथे तुतुं हे खी अर्थात् गेडागेडी दु ला धकाः ल्हाः पतिचां प्वाः खनाः खनाः उगु सालुगु चाया लासाय् माली । उकिं खी ल्ययेगु नापनापं तुले धुंकाः ध्वाकुनय् लाकी । वयां लिपा उकिं क्यूगु बँय् चा सुइत दयेका तःगु क्वँय् बापिं चा प्यपुंक सुचुक सुयाकाइ । थथे चा सुयेत मेय्या क्वँय्बापि माथं वंक दयेकातःगु औजार छ्यलीगु खः ।
चा मज्याःतले वा बांलाक ल्वाक्वः बाक्वः जुयाः भारा छियेत तयार मजूतले अथे हे हाकनं नौ बँय् ह्वलाः हाकनं उगु चापाँय् तुलातःगुयात दथुइ सालाः न्हापां बछिकय् लाकाः तुतिं तिक्वः च्वयाः छखें छखें चकंक चकंंक चा न्हुन्हुं यायेमाः । घौछि बाघौतक उकथं चा न्हुयाःलिं लिपा चा ज्याइ । चा ज्यायेधुंकाः इंचां कुचाकुचा जुइकाः चायात प्यकुंचा प्यकुंचा यानाः चाइ । अले निकू निकू चा कयाः न्हापां निपा ल्हातय् छपा छपा कयाः ल्वाकी । थथे ल्वाकेबलय् नं खी अर्थात् भारा छियेगु इलय् खनेदइगु भारा स्यंकेफुगु चीज लुयावइ । आखिर उकथं चा ल्वाकेधुंकाः लिपा वयाः ग्वारा ग्वारा चाग्वारा छखेलिक तयेयंकी ।
उकियात चा प्यं चिनेगु धकाः ग्वारग्वार तुइकाः च्वय् व क्वय् मथंकेत थनाः द्यःने चा ग्वारा चिनाःतुं हाकनं हाकनं दाया मथंकी । थथे त्या तयाः जूगु चाप्यं लिपा भारा छीगु चाखः वा सिँयागु चक्का वा हाल वयाः टायर वा ह्वील चाःहीकाः भारा तयार याइगु खः ।
चा न्हुयेत माःगु हलंज्वलं
चा न्हुयेगु निंतिं चा न्हुयेगु थाय् वा काँथलय् थीथी कथंया सामग्रीत दइ । न्हापां अन नौ तयेगु नौभ्यगः दइ । उकिं छक्वःपतिकं नौ ह्वलाः चा न्हुयेत छ्यलीगु खः । चा न्हुयेत तिंतिं न्हुयाः चा न्हुयेमाःगु जुयाः छपु बल्लाःगु तुतां दइ । मेबलय् ध्वाकुनय् धंकातःसां चा न्हुयेगु इलय् उकियात चुइ । चा तुलेधुंकाः खी ल्ययाः तयेत छगः भारा अथें तयातइ । नापं चा ज्यायेधुंकाः उकियात कुचाकुचा यायेत छपु पुलांगु जूसां चा भ्याः दुगु इंचा नं ब्यवस्थित अवस्थाय् स्वप्याना तःगु दइ ।