चित्रकलाकार अष्टवरसिंह शाक्यया जन्म ने.सं. १०५३ सिल्लाथ्वः अस्तमि, बसुबारकुन्हु येँया यतखा त्वालय् अबु बखतवरसिंह शाक्य व मां बालकुमारी शाक्यया कोखं जूगु खः । वय्कलं वि. सं. २०११ सालनिसें कला साधना डिजाइनपाखें न्ह्याकादीगु खः । वि.सं. २०१६ सालय् नेपाः झाःम्ह भारतीय प्रधानमन्त्री जवाहरलाल नेहरूयात वय्कलं वाग्वः छ्यलाः दयेकूगु महात्मा गान्धीया ख्वाःया तस्वीर लःल्हाना दिल ।
वय्कलं सुकां थानाः जुजु महेन्द्रया ख्वाःया तस्वीर, भगवान बुद्ध लुम्बिनी वनयात्रा यानाच्वंगु लः रङ्गया चित्र च्वयाः नेपाः झायादीपिं राष्ट्र प्रमुखपिन्त द्वहलपा लःल्हाना दिल । वय्कःया कला चीन, वर्मा, थाइल्याण्ड, जापान, श्रीलंका, भारत देसय् संग्रहित जुयाच्वंगु दु । वि.सं. २००८ सालय् ललितपुर आदर्श कला प्रदर्शनीइ वय्कलं लः रङ्ग चित्रय् न्हापांगु सिरपाः त्याकादीगु खः ।
वय्कःयात प्रबल गोरखा दक्षिणबाहु चौथो, प्रख्यात त्रिशक्ति पट्ट चौथा, प्रदीप्त वीरेन्द्र प्रजातन्त्र भाष्कर चौथा पदकं विभूषित याःगु दु । वय्कः ने.सं. ११२५ बछलागाः तृतिया, बसुबार स्वर्गारोहण जुयादिल ।