ललितकलाकःमि गोविन्द लालसिंह डङ्गोलया जन्म ने.सं. १०६७ थिंलाथ्वः नःमि, मंगलबारखुन्हु येँया ब्रम्हत्वालय् अबु चन्द्रलाल सिंह व मां श्यामादेवीया कोखं जूगु खः । भारतया बम्बइस जी.डी.ए. अध्ययन यानादीम्ह वय्कलं कला प्राध्यापन यानादी । वय्कलं थःगु न्हापांगु रचनाकथं सन् १९७१ य् चिकं रङ्गं चित्र च्वयादीगु खः । वय्कलं चित्रमाला भाग १, २ च्वयादीगु दु । वय्कलं गनेद्यःया थी थी आकृतिया ६० पाः चित्र व श्रीयन्त्रया चित्र नं च्वयादीगु दु । वय्कलं देशविदेशय् थ्यं मध्यं १२ क्वः तक याकःचिगु व मंकाः कला ब्वज्या यानादीगु दु । वय्कःया चित्र राजदरवार, भक्तपुर म्युजियम, यु.एस.ए., मेक्सिको, जापान, अष्ट्रेलिया, जर्मनी, इङ्गल्याण्ड, थाइल्याण्ड, इटाली आदि देसय् संग्रहित जूगु दु । वय्कलं सन् १९७१ य् भारतया बम्बइस जूगु अन्तर्राष्ट्रिय कला प्रतियोगिताय् न्हाप, सन् १९९४ य् रूस व इटालीइ विशेष पुरस्कार त्याकादीगु दु । वय्कःयात सन् १९९७ य् सुप्रबल गोरखा दक्षिणबाहु तेस्रो, वि. सं. २०५८ य् वीरेन्द्र–ऐश्वर्य सेवा पदक, दीर्घसेवा पदक व शिक्षा सेवा पदक नं द्यछाःगु दु ।