स्व. गणेशराज शाक्यया उपनां गनेद्यः खः । माज्या व थ्वज्याया छम्ह ज्वः मदुम्ह कलाकार वय्कः येँ, यंगाःया स्वबहालय् ने.सं. १००४ चिल्लाथ्वः अष्टमिकुन्हु जन्म जूगु खः । वय्कःया अबुजु स्व. सानुराज शाक्य खः । करणचुकया नाइके जुयादीम्ह थः बाज्या देवराज शाक्यया विशेष कलाया प्रेरणाकथं ने.सं. १०१८ निसें कलाकारिता ख्यलय् ज्या न्ह्याकादीगु खः । वय्कःया न्ह्यथने बहःगु कृतिकथं नेपाःया राणाकालिन प्रधानमन्त्री जुद्ध शम्सेरया दरवारया निंतिं माःकथंया वहःया वसजाःज्वलं दयेकादीगु खँ लुमंके बहःजू ।