कःचित कांम्ह धायेगु चलन दु । यलय् चिल्लागा आमाइकुन्हु कांम्ह सल ब्वाकी । पाहांचःहे्र कुन्हु बालकुमारी द्यःयात द्यःछेँ त्यागलं जात्रा यानाः पीगमय् स्वनी । आमाइकुन्हु वल्खु च्वंपिंसं गुथि हनाः पालंपाः दँय्दसं कांम्ह सल गयेमाः । न्हिनय्पाखे ख्यें सगं कयाः सैनिकतय्सं हःम्ह सल वल्खुं मंगः लाय्कू जुयाः बालकुमारी द्यःयाथाय् स्वचाः चाःहुलेवं कांम्ह सल ब्वाकेगु जात्रा क्वचाइ ।
न्हापा सलयात प्वक त्यंक नकाः सल गइम्हेसिनं धेधेचुइक अय्लाः त्वनी धाइ । थथे सल ब्वाकीम्हेसिगु न्ह्यः न्ह्यः ब्याहांचुलि धुनय् म्वाहालि पुयाः वनी । कांम्ह सल ब्वाके सिधयेवं बालकुमारी द्यःगमं खतय् बिज्याकाः जात्रा यानाः त्यागःया द्यःछेँय् थ्यनेवं लसकुस यानाः द्यः दुकाइ ।