थिमि देय्या मू लँया उत्तर पाःच्वःत्वाःया सिथय् गुंगः चिभाः दुगु थाय्यात नवचैत्य विहार धाइगु खः । गुंगः चैत्य छथासं पलिस्था यानातःगुलिं थुगु थाय्यात गुंगः चिभाः कथं सकस्या म्हसिका वयाच्वंगु दु । ख्वजप देय्या अखण्डशील महाविहारया (अखः बहा)या वज्राचार्यपिं थिमि देशय् च्वं वयेवं तिनि दयेकूगु बहाः जूगुलिं थिमि देय्या मेमेगु बहाः नाप थुगु बहाःया स्वापू मदु । ख्वप देशं थिमिइ च्वंवःपिं स्वखा परिवारया झिम्हति जक हे थुगु बहाःया संघ परिवारत खः । थुगु बहाः थिमिया दकलय् न्हूगु बहाः खः । चैत्यय् पलिस्था यानातःम्ह ध्यान मुद्राया बुद्ध हे संघ परिवारया क्वाःपाःद्यः खः ।
थुगु बहाmया आयस्ता, गुथि छुं मदुसां द्यः पाःलाः दयेकाः पुजा याना वयाच्वंगु दु । गुंलाबलय् द्यः ब्वयेगु चलन मदुसां थिमि देय्या गुंला बाजं, बहाः पुजाः वइबलय् थन नं वनेगु प्रचलन दु ।