यलया लुँहिति उत्तरपाखें लँ लिनाः जवपाखेया गल्लिं वनेबलय् बलाधरगुप्त संस्कारित बलाधरगुप्त महाविहार यछुबहाःया मूलुखाय् थ्यनी । थनया मूलुखां दुने चीकूगु चुकचा दु । थुकिं न्ह्यःने क्वाःपाःद्यःया देगः दु । थ्व देगः नितँजाः, छतँ पौ तयाः दयेकातःगु दु । थ्व देगःया मूलुखा कलात्मक यानाः सिँयागु दयेकातःगु दु । मूलुखां च्वय् अक्षोभ्य मूल यानाः जवंखवं भिक्षु निम्हेसिगु मूर्ति तयातःगु सिँया तोलं छगू दु ।
थनया बहाःद्यः उत्तरपाखे स्वयाच्वंम्ह ह्याउँख्वाःम्ह अक्षोभ्य खः । बहाःद्यःया न्ह्यःनेया त्वाथः जवंखवं ल्वहंया सिंह निम्ह दु । फलय् गं छगः दु । मूलुखाया च्वसं न्यापाः झ्याः व जवंखवं निपाः चिचीपाःगु झ्याः दु । थन त्वानाःसिँ नं दु । पल्लिं च्वय् देगः छगः दयेकाः उकी गजूया रुपय् चैत्य छगः तयातःगु दु । बहाःया चुकय् चैत्य छगः व धर्मधातु मण्डल छगः दु । यछुबहाः स्थापना जूगु खँ सीकेगु क्वातुगु श्रोत मदु । तर थनया पुलांगु अभिलेख मध्ये भूमिसम्बन्धी ताडपत्र ने.सं. ७५० या अभिलेख खः । थनया क्वाःपाःद्यः फुसय्या तोलनय् ने.सं. ७९४ अंकित जुयाच्वंगु दु । यछुबहालय् न्हापाया संघपिं न्हनावंगु जुयाः यलया उकुबहाःया संघया दुजःत मध्येयापिंसं सञ्चालन याना वयाच्वंगु खः । थन नित्य पुजा, नामसंगीति स्तोत्र, गःचाः हुलेगु, आरती पुजा, आगं पुजा, विहार बुसाधं, दिशी पुजा, संदेपुजा आदि याना वयाच्वंगु दु ।