कमलाक्षीबहाःकथं म्हस्यूगु थ्व विहार कुनाय्त्वालं नाचघर मथ्यवं जवपाखे (दरबार हाइस्कूलया उत्तरी मोहदाया गणेद्यया नापसं च्वंगु गल्ली दुने ) दु । ने.सं. ७७१ पाखे उदाय जयमांपिंसं पलिस्था यानाः तःक्षेबहाःया कचा बहाःकथं पुजाआजा यानावयाच्वंगु थ्व बहाःयात तेकंबहाः, कोतननिबहाः नं धाइ । संस्कृत भासं बोधिप्रस्थान विहार धया वयाच्वंगु दु । थनया क्वाःपाःद्यः उत्तराभिमुख अमोघपाश लोकेश्वर खः । क्वाःपाःद्यया मू लुखाया तोरं सिँया खनेदु । तोरणय् धर्मधातु बागीश्वरया मूर्ति कियातःगु दु । क्वाःपाःद्यया मू लुखाया जवंखवं चिपागु याकःझ्याः छपाः छपाः नं तयातःगु दु । जवय् पाखे ल्वहंपौ छपा नं दु । तोरणया च्वय् स्वपाःझ्याः दु । च्वय् बार्दली दुसा वयां च्वय् नितःजा यानाः मनूत च्वने जिइक न्यातँ जाःया छेँ दयेकातःगु खः । बहाःया क्वाःपाःद्यःया न्ह्यःने चिभाः छगः नं पलिस्था यानातःगु खनेदु ।