तेबहालय् निगू बहाः दु । क्वाःपाःद्यः व पाःलाः द्यःया न्ह्यःनेसं बन्धुदत्त विहार पलिस्था यानातःगु दु । तःजाःगु फःया द्यःने थ्व विहारया क्वाःपाःद्यः (अक्षोभ्य बुद्ध) यात पलिस्था यानातःगु दु । थ्व बहाःया क्वाःपाःद्ययात मुगःद्यः धकाः स्थानीयतय्सं हना वयाच्वंगु दु । थ्व बहाः जुजु नरेन्द्रदेवं थः गुरु बन्धुदत्त बज्राचार्यया निंतिं दयेकाबिउगु खः । थन तोरं धाःसा मदु । मू लुखाया जवंखवं सारीपुत्र व मौद्गल्यायनया मूर्ति दु । थ्व द्यःयात नित्यपूजा विहारया थाकुलिं जीवंकाःछि यायेमाः । तर थाकुलियात थाकु मजुइकथं विहार संघपाखें थौंकन्हय् सुथय् थाकुली व सनिलय् संकटा द्यःया पाःलाः नं यायेगु नियम यानातःगु दु । मुगःद्यःया न्ह्यःने निगः चिभाः दु । चुलिंचु चिभाःया क्वसं मन्दःपाः छपाः नं दु । नापं पःखालय् थीथी चिचिधिकःपिं द्यः नं पलिस्था यानातःगु दु । अथेहे ससुद्यः व चिभाःत यक्व खनेदु ।