वतु तःधंबहाःया निगुगू कचा बहाःकथं थ्व बहाःयात कयातःगु दु । तःधंबहाःया पश्चिमपाखे चीधंबहाःया न्ह्यःनेसं थ्व बहाः दु । थ्व बहाःयात पिच्छेबहाः वा खुँबहाः नं धाइसा संस्कृत भासं जाम्बनन्द विहार धाइ । आःतक थ्व बहाःया रुप स्यंगु मदुनि । छचाःखेरं नितँ जाः आँय्पापौया पलिं चिनातःगु थ्व बहाःया स्थापना ने.सं. ७११ पाखे बहाःया शाक्यभिक्षु जयलक्षजुं थःगु जग्गादान बियाः याःगु खः ।
थ्व बहाःया क्वाःपाःद्यः उत्तराभिमुख अक्षोभ्य बुद्ध खः । थ्व बहालय् छचाखेरं चाःहिले जिइक फः तयातःगु दुसा क्वाःपाःद्यःथाय् दुहां वनेगु फःया त्वाथलय् जवंखवं निम्ह चीधिकःपिं सिंह तयातःगु दु । क्वाःपाःद्यःया फुसय् सिँया त्वलं नं दु । त्वलंया फुसय् पसुकाझ्याः व जवंखवं याकझ्याः नं दु । अथेहे क्वाःपाःद्यया न्ह्यःनेसं तुयुचिभाः देगःयात सिजपौ तयाः त्वपुयातःगु दुसा जवपाखे ल्वहंया छत्रपाल दु ।
थ्व बहाःया पलिस्था याःम्ह शाक्यभिक्षु जयलक्षजुयात उगु इलय् तसकं तःमिम्ह, जुजुलिसे सःतिम्ह जक मखसे राजकाजय् नं प्रभाव दुम्हकथं कायेगु याः । उकिं राज्यपाखें देया अपराधय् लगे जूपिं खुँ, डाका, फताहातय्त बौद्ध शिक्षा बियाः नैतिकवान दयेकेत थ्व बहालय् तये हइगु जुयाच्वन । थज्याःपिं अपराधीतय्त तइगु बहाः जुयाः मनूतय्सं थ्व बहाःयात खुँ बहाःकथं म्हसीकल । कालान्तरय् खुँबहाः हे धायेगु यानायंकल ।