येँ जिल्लाया दक्षिणपाखे कीर्तिपुर नगरपालिका दुने लाःगु छगू प्राचीन नेवाः वस्ती खः चोभार । येँया लाय्कुलिं थ्व थाय् ६.४ किमी तापाः ।
चोभार धार्मिक, सांस्कृतिक व भौगोलिक ल्याखं अतिकं नांजाःगु थाय् खः । स्वयम्भू पुराणकथं स्वनिगः लखं जायाच्वंगु इलय् बोधिसत्व मञ्जुश्रीं थ्वहे थासय् लः पिहां वनीगु निकास दयेकाः स्वनिगःयात मनू च्वने लायक बस्ती दयेकूगु खः । थन चखुंति बखुंति नांगु निगू गुफा नं दु । १२५० मिटर ताःहाकःगु थ्व गुफा एशियाया हे दकलय् ताःहाकःगु गुफा मध्ये छगू खः । थन थीथी जातिया जडीबुटी व ल्वहंचुंया पहाड नं दु ।
चोभारया क्वय्ना गणेद्यः, क्वय्ना खुसि व आनन्दादी लोकेश्वर अतिकं नांजाः । थ्व बौद्ध व हिन्दूतय् पवित्र स्थल खः । क्वय्ना गणेद्यःयात जलविनायक नं धाइ । जलविनायक स्वनिगःया प्यम्ह गणेद्यः मध्ये छम्ह खःसा आनन्दादी लोकेश्वर नं स्वनिगःया प्यम्ह लोकेश्वर मध्ये छम्ह खः । थन हरेक दँय् माय् अपसं धकाः लछि धलं दनाः अपसं च्वनेगु चलन दु ।