स्वनिगः नेपाःया प्रशासनिक व राजनीतिक केन्द्र जक मखु थनया सभ्यता, संस्कृति अले सम्पदाया कारणं अन्तर्राष्ट्रिय ख्यलय् मुक्कं नेपाः देय्यात बिस्कं म्हसीका बीगु थ्व मूलिधँसा हे खः । थन दुने द्वलंद्वः दँनिसें विकास जुयावःगु सुसंस्कृत मानवीय सभ्यता गुकिया थःगु हे मूल्य, मान्यता व जीवन दर्शन नं दु । थ्वयात मुक्कं मानव सभ्यतया छगू गौरव धकाः नालातःगु दु । उकिं हे थ्वया हिमवत्खण्ड नेपालमण्डल दुने जक मखु, थुगु उप–महाद्वीप न्यंक हे अतिकं विशिष्ट थाय् दु । अध्येता, अनुसन्धाता व विज्ञपिन्सं थुकथंया स्रष्टा व सर्जक कथं स्वनिगःया मूवासी नेवाः समुदाययात च्वछायेगु यानावयाच्वंगु दु ।
तर थीथी कारणं यानाः थुज्वःगु तःजिगु ज्ञान, जीवन दर्शन, संस्कृति अले सम्पदा कन्हय् वनाः न्हनावनीगु, तनावनीगु खःला धयागु अनुभव जू । छखे थुलि तःजिगु व मूवंगु सम्पदा संस्कृतिया ज्ञान तःथाय्, तःखे चिचाःदनाच्वंगु दु, मेखे विज्ञ, ज्ञाता वा श्रोतव्यक्तिपिं नं बुलुहुं पाः जुजुंवनाच्वंगु दु । थुज्वःबलय् इलय् हे माःगु पलाः ल्ह्वनेगु हथाय्गु ज्या खः । अथे धयागु आःतक उपलब्ध स्रोत, सूचना व ज्ञानयात छथासं मुंकेगु, लिपिबद्ध यायेगु अले उकियात गुकथं सुरक्षित यायेफइ धयागुपाखे पाय्छिगु पलाः छीगु खः । थथे जुल धाःसा ज्ञान, सीप, कलाया खँ लिपातक ल्यंकातयेफइगु जक मखु, लिपाया पुस्तायात लःल्हानाबी फइगु संभावना नं जुइ ।
थ्व ज्या येँ महानगरपालिका थुज्वःगु जननिर्वाचित स्थानीय सरकारपाखें कःघायेमाः धकाः वाःचायेकागु जुल । संघीय संविधानपाखें प्रत्याभूत स्वायत्त अधिकार व दायित्व पूवंकेत धकाः
जनतापाखें पत्याः यानाः महानगरपालिकाया नेतृत्वय् थ्यनेधुंकाः थुज्वःगु ज्यायात अतिकं महत्व बियागु खत । न्हून्हूगु भौतिक संरचना, सुविधा व सेवाया नापनापं झीगु इतिहास व गौरवनाप स्वानाच्वंगु सम्पदा–संस्कृतिया संरक्षण व प्रवर्द्धनय् नं उलि हे मू बीमाः धयागु येँ महानगरपालिकाया आधारभूत मान्यता नं खः ।
नेपालभाषा एकेडेमि थुज्वःगु अतिकं सम्मानित व स्थापित प्राज्ञिक संस्थानाप जानाः येँ महानगरपालिकापाखें थःगु आज्जु व ग्वसाः कथं झी नेपाःया मौलिक सम्पदा–संस्कृति संरक्षणया झ्वलय् नेवाः सांस्कृतिक ज्ञानकोश दयेकेगु थुज्वःगु तःजिगु परियोजनाया निंतिं सहकार्य यायेदत, थ्व गर्वया खँ जक मखु ऐतिहासिक नं खः धकाः तायेकागु खत । येँ महानगरपालिकां थुकियात थःगु थीथी परियोजना मध्ये थ्व ज्ञानकोश निर्माण परियोजनायात गौरवया ज्या कथं नालागु दु । थुज्वःगु महत्वपूर्ण ज्याय् नापनापं ज्या यायेगु थ्व अवसरया निंतिं महानगरपालिका उलि हे लय्ताः ।
ज्ञानकोश थुज्वःगु अतिकं तःजिगु, तब्यागु अले थाकूगु ज्या पूवंकेत गुलि नं विज्ञ, विद्वानजनपिन्सं ग्वाहालि यानादिल, वय्कःपिं सकलप्रति येँ महानगरपालिका अतिकं कृतज्ञ जुया ।
भलसा कया थ्व ज्ञानकोश सकलसिगु निंतिं उलि हे ज्याख्यले दइ, सकसिनं थ्व कुतःयात उलि हे च्वछाइ, उलि हे ययेकी ।
बालेन्द्र शाह
प्रमुख
येँ महानगरपालिका
कमलादि, येँ ।