मानव सभ्यताया प्रतीक हे समाजया कला, संस्कृति व सम्पदा खः । येँ, यल व ख्वप लगायत नेपालमण्डलया मूलवासी नेवाःतय्सं हनावयाच्वंगु कला, संस्कृति व सम्पदा हे नेपाल देय्या कला, संस्कृति व सम्पदाकथं न्ह्यब्वया वयाच्वंगु दु । नेवाः संस्कृति व सम्पदां नेपाः देय्या हे सभ्यता व इतिहास ब्वयाच्वंगु दु । नेपाःया सभ्यता व इतिहास अध्ययन याइपिं हलिंन्यंकया अनुसन्धाता, अन्वेषक व अध्येतापिन्सं नेवाः कला, संस्कृति व सम्पदाया हे दुग्यंक अध्ययन व अनुसन्धान यानावयाच्वंगु दु । नेपाःयागु हे सभ्यता प्रतिविम्वित जुयाच्वंगु नेवाः संस्कृति व सम्पदा सम्बन्धी ज्ञान न्हूगु पुस्तायात नं व्यवस्थितकथं लःल्हायेमाःगु दु । थुकिया निंतिं संस्कृति व सम्पदायया सुचं व ज्ञान व्यवस्थितकथं अभिलेखीकरण यायेमाःगु दु । येँ महानगरपालिका व नेपालभाषा एकेडेमि दथुइ सहकार्य यानाः नेवाः कला, संस्कृति, सम्पदा, शिल्प प्रविधिया अभिलेखीकरण यायेगु निंति तसकं महत्वपूर्ण व गौरवया नेवाः सांस्कृतिक ज्ञानकोश परियोजना न्ह्याःगु दु । थ्व परियोजनापाखें मूकथं नेवाः व नेपाः देय्या हे सभ्यताया सूचक संस्कृति व सम्पदाया सुचं व ज्ञान छथाय् मुंकेगु ज्या जूगु दु ।
समाजया विकासक्रम लिसेलिसें हलिंन्यंकया सामाजिक व सांस्कृतिक अन्तरघुलनया हुनिं नेवाः संस्कृति व सम्पदा सम्बन्धी ज्ञान, मूल्य मान्यता व दर्शन मथुयावनाच्वंगु दु । नेपाःया मौलिक संस्कृति व सम्पदा संरक्षण व सम्वर्द्धन यायेमाःगु वाःचायेकाः थुकिया अभिलेखीकरणया ज्या न्ह्याकूगु दु । नेपाल राष्ट्रया हे गौरव जुयाच्वंगु नेवाः संस्कृति, नखःचखः, जात्रापर्व, देगः, लाय्कू, सतः, चीभाः, ख्यः दुने दुसुनाच्वंगु नेवाः दर्शन व सभ्यताया ज्ञान छथाय् मुंकेगु कुतः जूगु दु । राष्ट्र व समाजया परम्परा, प्रवाह व सभ्यता प्रतिविम्वित
जुइकथं च्वयातःगु नेपालभाषा साहित्य, स्रष्टा व कृतिया अभिलेखीकरण जूगु दु । नेपाःया नाटक, म्ये, संगीत आदिया सुचं मुंकाः नेपालया सांस्कृतिक प्रवाहया खँ मुंकूगु दु । नेवाः समाजया शिल्प, कला व प्रविधि सम्बन्धी मौलिक ज्ञान मुंकाः सभ्यता न्ह्यब्वःगु दु ।
येँ महानगरपालिकाया मूलवासी नेवाः समुदायया कला, संस्कृति, सम्पदा, साहित्य, शिल्प, प्रविधि व नाट्य संगीत सम्बन्धी ज्ञानयात छथासं मुंकाः व लिपिबद्ध यानाः नेवाः सांस्कृतिक ज्ञानकोश पिदंगु दु । थ्व ज्ञानकोश नेवाः समुदायया निंतिं जक मखु येँ महानगरपालिका व नेपाः राष्ट्रया निंतिं हे छगू तसकं महत्वपूर्ण उपलब्धि जूगु दु । थ्व ग्रन्थ न्हूगु पुस्तायात संस्कृति व सम्पदाया ज्ञान व सीप लःल्हानाबीत ग्वाहालि जुइ । अथे हे नेवाः व नेपाःया बारे अध्ययन अनुसन्धान याइपिं अनुसन्धाता व अध्येतापिन्त नं ग्वाहालि जुइ । येँ महानगरपालिकाया संस्कृति व सम्पदा संरक्षण व प्रवर्द्धन यायेगु आज्जुइ नेवाः सांस्कृतिक ज्ञानकोश छगू महत्वपूर्ण उपलब्धि जूगु दु ।
येँ महानगरपालिका स्थानीय सरकारपाखें स्थानीय संस्कृति, सम्पदाया संरक्षण व प्रवर्द्धन यायेमाःगु भाला पुवंकेत सचेत व सजग जुयाः न्ह्यज्यानाच्वनागु दु । येँ महानगरपालिकां न्हूगु भौतिक विकास निर्माणया नापनापं येँ महानगरया गौरव व सभ्यता पिब्वइगु संस्कृति सम्पदा संरक्षण व प्रवर्द्धनया ज्याय् नं उतिकं हे महत्व बियाः ज्या न्ह्याकावयाच्वनागु दु ।
नेपालभाषा साहित्य व नेवाः सभ्यताया ख्यलय् ज्या यानावयाच्वंगु अतिकं सम्मानित प्राज्ञिक संस्था नेपालभाषा एकेडेमिलिसे जानाः येँ महानगरपालिकापाखें नेवाः व नेपाःया मौलिक संस्कृति व सम्पदा संरक्षणया पहलकथं नेवाः सांस्कृतिक ज्ञानकोश पिथनेगु तःजिगु परियोजनाय् सहकार्य यायेदुगु खँय् तसकं गर्व तायेकागु दु ।
संस्कृति, सम्पदा व समग्र सभ्यताया हे ज्ञान मुनाच्वंगु अतिकं तःजिगु व मूवंगु नेवाः सांस्कृतिक ज्ञानकोश ग्रन्थ पिथनेत जानादीपिं सकल विज्ञपिं, विद्वानजनपिं व व्यवस्थापन पुचःया दुजःपिन्त येँ महानगरपालिकापाखें कृतज्ञता व साधुवाद देछाया ।
थ्व नेवाः सांस्कृतिक ज्ञानकोश संस्कृति सम्पदाया अध्ययन अनुसन्धान याइपिं, संरक्षणया ज्याय् न्ह्यचिलादीपिं व सम्पदायात मतिना याइपिं सकलसितं हे ज्या वइ धकाः भलसा कयागु जुल । कला, संस्कृति व सम्पदा संरक्षणया प्राज्ञिक ज्याय् नेपालभाषा एकेडेमिलिसें लिपालिपा नं सहकार्य यानाः न्ह्यज्याना वनेगु मनंतुना ।
सुनिता डंगोल
उपप्रमुख
येँ महानगरपालिका
कमलादि, येँ ।