अप्पा छीत बुँचायात न्हापां गाः म्हुयाः चागाः दयेकाः चा लिकाइ । उगु चायात माःछि माःछि लः तयाः तुतिं न्हान्हां ताकुकी । ताकुगु चा लस्सादार जुइवं अप्पा छीत तयार जुइ । न्ह्यथुकुन्हु सनिलय् न्हायातःगु उगु चां सुथय् न्हापांनिसें खँल्हय् ल्ह्यया यंकाः त्याःत्याः चात्याः तयातइ । सिँयागु थासा छ्यलाः छु भट्टायागु अप्पा खः, उगु भट्टाया अप्पा धइगु लोगो वयेकाः अन अप्पा तयार याइ । अप्पा तयार यायेत न्हापा जूसा सिँयागु थौंकन्हय् धाःसा प्लाष्टिकयागु टाँचा साँचो वा पलनय् वालातःगु चा माक्व त्वाःल्हानाः भ्यात्त स्वथनी । अप्वः जुक्व नतूचां चानाकाइ । थ्व अप्पा तयार यायेबलय् पँचा भचा प्य मपुंकेत थासाय् तयेमाः । ध्वाक्क छथु बँय् ल्ह्वाकाक्क संक ख्वानाः उगु थासा भपुइकी । अप्पा तयार जुइ ।
खँल्हय् थथे तयार यानाः पानातःगु अप्पायात भचा गनेवं सिलिनं चुइक थनी । क्वय् व च्वय् निखें उत्थें यानाः गंकेगु निंतिं थथे थनीगु खः । वयां लिपा उकियात भचा मगंबलय् हे यंकाः पँतने यंकी । गुलिं गंगु व गुलिं मगंगु अप्पायात थाय् थासय् पँ तयाः ल्याः खाइ । अगलय् यंकाः उइ ।