कवि सुदन खुसःया छेँया नां सुदनबहादुर तण्डुकार खः । वय्कःया जन्म बि.सं.२०१३ माघ १३ गते बागबजारय् जूगु खः । वय्कःया बाःया नां रत्नबहादुर तण्डुकार व मांया नां कृष्णमाया तण्डुकार खः । वय्कः नेपालभाषाया छम्ह आधुनिक कवि खः । भाजु सुदन खुसः विषेशतः कवि खःसां इलय् ब्यलय् बाखं नं च्वयादी । वय्कःया न्हापां वर्तमान : छगू मूल्यांकन नांयागु कविता झी पत्रिकाय् ने.सं. १०९४ य् पिदंगु खः । वय्कःया प्रकाशित कृति – तनावंगु लागा (ने.सं.११०५) कविता संग्रह खः । भाजु सुदन खुसःजुं चकना साहित्यिक दँ पौया सम्पादन यानादीगु दु । अले वय्कः चकना साहित्य पाःलाःया नायः नं जुयादीगु दु । लिसें वय्कः लिजः नेपालभाषा कविता दबूलिसे नं आवद्ध जुयादी । सुदन खुसःजुं झी प्रधान सिरपाः व राष्ट्रिय प्रतिभा पुरस्कार कयादीगु दु ।