थ्व अगिंमथः बाखं सफू खः । थ्व बाखं सफूया बाखं च्वमि भाजु हितकरवीरसिंह कंसकार खः । थ्व सफू ने.सं. १०८४ स लूजः प्रकाशन, येँ पाखें प्रकाशित जूगु खः । यौन वीभत्सता व सामाजिक कुप्रथां लेखकया नुगलय् दनावःगु विद्रोहात्मक अभिव्यक्ति व यचुपिचु मतिनाया मिफुति खः थ्व अगिंमथः सफू । नेपालभाषाया सशक्तगु बाखं सफू खः थ्व अगिंमथः । थ्व सफुतिइ १२ पु सशक्तगु बाखं दुथ्यानाच्वंगु दु ।

अष्टरत्न धाख्वा व रत्नदेवी धाख्वाःया म्हयाय्मय्‌जु पुनिता धाख्वा यलया नागबहालय् वि.सं. २०२६ सालय् जन्म जूगु खः । वि.सं. २०४५ य् वर्माय् प्रव्रज्या ग्रहण यासेंलि वसपोल अग्गञाणी गुरुमां जुयाबिज्यात । प्रव्रज्या ग्रहण यानाबिज्यायेधुंकाः वसपोलं म्यानमारय् बुद्धधर्मया उच्च शिक्षा सासनधज धम्माचरिय’ उपाधि हासिल यानाबिज्यात । वसपोल थौंकन्हय् नेपालय् शंखमूलस्थित अन्तर्राष्ट्रिय बौद्ध भावना केन्द्रय् परियत्ति शिक्षा अध्यापन व बौद्ध अध्ययनया स्नात्तकोत्तरया विद्यार्थीपिंत प्रध्यापन ज्याया नापं ध्यान शिविर संचालन याना बिज्यानाच्वंगु दु । वसपोलं त्रिपिटक पालिया चूलनिछेस नेपालभाषां अनुवाद यानाबिज्याःगु दुसा वसपोलया मौलिक बुद्धधर्मया लेख मुना सद्धर्म पुष्पमाला सफू ने.सं. ११३४ य् पिदंगु दु । अथेहे वसपोलं पालि शिक्षा व संक्षिप्त व्याकरण सफूया नापं आपालं मेमेगु नं बद्धधर्म सम्बन्धी सफू च्वयाबिज्याःगु दु ।

भाजु अच्युतानन्द राजोपाध्यायया जन्म बौ चेतानन्द राजोपाध्याय तथा मां चैत्यन्यवानेश्वरी राजोपाध्यायपाखें ने.सं १०४७ कौलाथ्व चतुर्दशी खुन्हु येँया न्ह्योखा त्वालय् जूगु खः ।  वय्‌कःया प्रारम्भिक शिक्षा येँया दरवार स्कूल संस्कृत विद्यालयय् जूगु खःसा अनंलि वनारस विश्वविद्यालयपाखें वय्‌कलं वेदान्त शिक्षाय् आर्चाय पास यानादिल । नेपाः लिहां झायेधुंकाः मिसामचातय्‌त नं आखः ब्वंकेमाः धैगु बिचाःयाम्ह वय्‌कः कन्या मन्दिर माध्यमिक विद्यालय स्थापना यायेगु ज्याय् अग्रसर जुयादिल । कन्या मन्दिर विद्यालय् स्थापना जुसांनिसें अवकास प्राप्त मजूतले अन वय्‌कलं संस्कृत, नेपाली व चित्रकला विषय ब्वंकेगु यानादिल ।

भाजु अच्युतानन्द नेवाः समुदायया जक पुरोहित मखु हनुमाध्वाखाया तलेजु भवानी देगःया मू पुरोहित खःसा ग्वलदेय्‌या पशुपतीइ च्वंगु दिच्छिनामूर्तिया नं मू पुजारी खः । भाजु अच्यतानन्दया नेपालभाषाया निंतिं दकलय् मूवंगु ज्या धैगु माघ महिनाबलय् कनीगु स्वस्थानी धर्मव्रत कथा न्हापा नेपाल लिपिं जक च्वयातःगुयात नेपालभाषा देवनागरी लिपिं हिलाः सफूया रुपय् पिकयादीगु खः । थ्व स्वस्थानी सफू फुक्कस्यां ब्वनेमा धैगु तातुनाः स्वदँ बिकाः अति मिहेनत यानाः ने.सं ११०० य् प्रकाशन यानादीगु खः । थथे देवनागरी लिपिं पिदंबलय् थ्व सफू नेवाः समुदायलय् तसकं लोकप्रिय जुल । थ्व सफुलिं स्वस्थानी बाखं ब्वन अःपुकाब्यूगु जक मखु नेपालभाषाया नं प्रचार प्रसार जुइकेबिल । थौं नेवाःतय्‌सं थ्व हे सफू ब्वनाः माघ महिनाबलय् छेँय् छेँय् स्वस्थानी बाखं कनेगु यानाच्वंगु दु । अथेहे वय्‌कलं संस्कृतया हितोपदेशया बाखं नेपालभाषां हीकाः तत्कालिन सितु पत्रिकाय् पिकायेगु यानादीगु दुसा वयकःया तःपु हे कविता सितु लगायत झी आदि पत्रिकाय् पिदंगु दु । वय्‌कःया योगदानयात कदर यानाः कन्या मन्दिर माध्यमिक विद्यालय लगायत मेमेगु संस्थां नं सम्मान देछाःगु दु । छन्हु थ्व नस्वर देह फुक्कस्यां त्वःतेमाः धाथें अच्युतानन्दं नं ने.सं ११११ य् थःगु नश्वर देह त्याग यानादिल ।

ध्याचु च्वखँमि सौरभ शाक्यया कृति खः अजब नेपाः गजब ख्वाःपाः । थ्व सफू ने.संं ११३३ य् कुतः पिकाकः पाखें पिहांवःगु खः । थ्व सफुलिइ ताताहाकःगु १७ पु ध्याचु च्वखँ दुथ्याःगु दु गुकी च्वमिं राजनीतिक परिवेश, सत्तालिप्सा, सत्ताया नितिं यानाच्वंगु बकबासया धकिं उलातःगु दु । अथेहे उत्पीडित, अवहेलित व शोषित वर्गप्रति सहानुभूति प्वंकातःगु दु ।

अजा–अजिपिं श्यामप्रसाद शर्माया कृति खः । ने.संं १११९ स कुतः पिकाक पाखें पिदंगु थ्व सफूलिइ झिपु च्वखँ व प्यपु म्ये दुथ्याःगु दु । ज्येष्ठ नागरिकबारेया थ्वः सफुलिइ ज्याथ–जिथितय्‌गु खँय् झीगु नीति, बुह्रा बैंस, ज्याथ–जिथिप्रति झीगु नीति, ज्याथ–जिथितय्‌गु खँय् विश्व बैठक, एसियाय् ल्याय्‌म्हत उप्वः, युरोपय् ज्याथ–जिथित उप्वः, अजाअजिपिं, ज्याथ–जिथित फुकं थः अजा–अजि थें हे खः, ज्याथि–जिथितय्‌त ध्यान बियेगु याये, अबुया ख्वाः स्वयेगु लसताय् बुराबुरिपिंत नं स्वयेगु याये व ज्याथ–जिथिपिनिगु लागि यायेमाःगु ज्या व यायेफइगु छुँ ज्या शीर्षकय् च्वया तःगु दु ।

कृष्णभक्त बोडेया थुगु अजिस्वां सफू ने.सं. ११२६ तछलाथ्वय् कुतः पिकाकः ख्वपया लुखां पिदंगु खः । थुगु सफुलिइ ५५ पु हाइकु दुथ्याकातःगु दु । थुगु सफुलिइ बुद्धया देशय् शान्ति मदुगु खँ न्ह्यथनातःगु दु । नेतातय्‌सं यानाः जनता भःभःमिनाच्वंगु अवस्था लिसें प्रकृति, प्रेम, युद्ध, हिंसाया खँ न्ह्यथना तःगु दु ।

मां कमला व बौ अमर ताम्राकारया कोखं ने.सं. १०७५ स जन्म जूम्ह अञ्जना ताम्राकार चिहाकःगु ई दुने बाखं, चिनाखँ, हाइकु व उपन्यास च्वयाः साहित्य ख्यलय् दंझाःम्ह छम्ह बहुमुखी प्रतिभाशाली च्वमि खः । बाखं ख्यलय् अञ्जनाया सफू पिदंगु मदुनिसां थीथी पत्रपत्रिका तथा सामाजिक सञ्जालय् थ्वय्‌कःया तःपु बाखं पिदंगु दु । थौंया आधुनिक समाजय् खनेदुगु विकृति विसङ्गतियात ब्यङ्गात्मक रुपं न्ह्यब्वयेगु थ्वय्‌कःया बाखंया विशेषता खः । उपन्यास विधाय् थ्वय्‌कःया ह्यूपाः (ने.सं. ११४१) नांगु उपन्यास पिदंगु दु । ईया ह्यूपाः लिसें झीपिं नं हिलेफयेमाःगु सन्देश बियातःगु थ्व ह्यूपाः उपन्यास आख्यानकार मथुरा साय्मिं आह्वान याःगु उपन्यास धेंधेंबल्लाः कासाय् (ने.सं. ११४१) ल्यू सिरपाः त्याकेत ताःलाःगु दु । अथेहे कविता ख्यलय् मय्‌जु अञ्जनाया लुमन्तिया जः (ने.सं.११४१) हाइकु मुना सफू व मतिनाया न्हाय्‌कं (ने.सं.११४२) चिनाखँ मुना सफू पिदंगु दु । थः मत्यवं मदुम्ह जहान रमेश ताम्राकारया लुमन्तीयात कयाः रचना यानातःगु थुपिं काव्यं वय्‌कःयात जूगु बेदना केवल वय्‌कःया जक मजुसे ब्वमिपिनिगु नुगःयात नं उलि हे संवदेनशील जुइके ब्यूगु दु । न्हापा छम्ह सफल मिसा उद्यमी कथं थःत म्हसीका च्वनादीम्ह मय्‌जु अञ्जना लिपा वयाः च्वसा न्ह्याकेगु जक मखु थीथी नेपालभाषाया संस्थाय् आवद्ध जुयाः नं ज्या यानादीगु दु । थ्वय्‌कः नेपालभाषा मिसा साहित्यकार मुनाया अध्यक्ष खःसा हलिं नेवाः दबू नेपाल च्याप्टरया कोषाध्यक्ष नं खः ।

मां गीता लक्ष्मी खड्गी व अबु जीवन राज खड्गीजुया म्ह्याय् मयजु अञ्जीता खड्गीया जन्म येँया डिल्लीबजारय् ने.सं. ११०६ सिल्लागाः १३ कुन्हु जूगु खः । एल.एल.बि, ग्रामीण विकासय् स्नातकोत्तर व नेपालभाषा विषयय् स्नातकोत्तर जुयादीम्ह वय्‌कलं कानून व्यवसाययात हे थःगु लजगाः कथं न्ह्याकाच्वनादीगु दु । मचानिसें समाजसेवाय् मनक्वसाःम्ह वय्‌कलं तःक्वमछि हे युवातय्‌त नेतृत्व व वृत्ति विकास विषयया प्रशिक्षण बीगु ज्या यानादीगु दु । थौंकन्हय् वय्‌कः नेपाल खड्गी सेवा समितिया नायः खः । नेवाः समुदाय दुनेया थीथी जातीय खलकय् वय्‌कः न्हापांम्ह मिसा नायः खः। लिसें वय्‌कः नेवाः देय् दबूया निर्वतमान दांभरि, नेवाः भोलन्टियर्सया न्वकू, नेपाल ग्रीस मैत्री तथा सांस्कृतिक संघया आजिवन दुजः व नेवाः आइडल ज्याझ्वःया कजि नं खः ।

ब्वनेगु च्वयेगुली लगनशीलम्ह वय्‌कलं नेपालभाषा व खस नेपाली भाषां, थीथी पत्रिकाय् साहित्य, संस्कृति व कानून सम्बन्धी च्वसु पिथनादीगु दु । अथेहे वय्‌कलं तीर्थ महात्म्य अभिलेख ग्रन्थया सम्पादन यानादीगु दुसा वय्‌कःया नायः सिंह, शाही खड्गी समाजया संस्कार (ने.सं. ११४०) व नायः प्रोफाईल नांगु निगू सफू नं प्रकाशित जूगु दु । वय्‌कः नेपाल खड्गी सेवा समिति पाखें पिदगु नायः जागरण लय्‌पौ, (ने.सं.११३३), खुक्वःगु दँ मुँज्या विशेष अंक व स्वर्ण स्मारिका (ने.सं ११४३) आदिया सम्पादक नं खः ।

अध्ययन अनुसन्धानपाखे मन क्वसाःम्ह मय्‌जु अञ्जीता खड्गीयात नेपालभाषा केन्द्रीय विभागं, सूर्यमाया छात्रवृत्ति (ने.सं.११३६) प्रदान याःगु दुसा नायः समुदायया मृत्यु संस्कारबारे अनुसन्धान यायेत नेपालभाषा मिसा खलःपाखें चम्पा टंकबिलास बिजु नेवाः हःपाः सिरपाः (ने.सं. ११३१) लःल्हाःगु दु ।

भाजु अणुराज जोशी बौ वांगमय शताव्दी पुरुष सत्यमोहन जोशी व मां राधादेवी जोशीया कोखं दकलय् तःधीम्ह काय्‌या रूपय् ने.सं १०६९ य् यलया बखुंबहालय् जन्म जूगु खः । सत्यमोहन जोशीया संयोजकत्वय् स्थापना जूगु लोकसाहित्य परिषदया थौंकन्हय्‌या संरक्षकमध्ये भाजु अणुराज नं छम्ह खः । एयर ट्राफिक कन्ट्रोलर जुयाः नेपाःया उड्डयन सेवाय् तःदँ तक ज्या यानाः थौंकन्हय् अनिवार्य अवकास प्राप्त यानादीम्ह भाजु जोशीं नेपालभाषा ख्यलय् अनुवादकया रुपय् थःत म्हसीके बियादीगु दु । थ्वय्‌कलं स्कूल जीवनय् नेपालभाषां छुं च्वयेगु यानादीगु खःसां लिपा जागीरं अवकाश प्राप्त जुइधुंकाः जक अनुवाद यायेगु ज्या यानादीगु खः ।

सत्यमोहन जोशीं नेपालभाषां च्वयादीगु ने.सं. ११०४ य् प्रकाशित जूगु वय्‌कःया माष्टरपीस धायेबहःगु नेपालया राष्ट्रिय विभूति कलाकार अरनिकोया श्वेतचैत्य नांयागु महाकाव्य अणुराज जोशीं दकलय् न्हापां अंग्रेजी भाषं अनुवाद यानाः ने.सं. ११२८ य् The Lasting Gift नामं प्रकाशित यानादिलसा लिपा व हे महाकाव्ययात नेपाली भाषां नं भाय् हीकाः ने.सं. ११३४ य् अरनिकोकृत श्वेतचैत्य नामं प्रकाशित याःगु खः ।

ने.सं. ११४१ य् नेपालभाषां प्रकाशित जूगु अणुराज जोशीया न्हापांगु सफू धाःसा भाजु नरेन्द्रराज प्रसाईं नेपाली भाषं सत्यमोहन जोशीया जीवनया विविध आयामयात कयाः च्वयातःगु शताव्दी पुरुष सत्यमोहन जोशी ग्रन्थया नेवाःभाषं अनुवाद वाङ्मय शताब्दीपुरुष खः । थुकथं वय्‌कलं शताब्दीपुरुष सत्यमोहन जोशीया सफू नेपाली व अंग्रेजी भाषं अनुवाद यानाः अले शताब्दीपुरुष सत्यमोहन जोशी विषयया सफू नेपालभाषां अनुवाद यानाः थः अबु सत्यमोहन जोशीयात जक म्हसीके बियादीगु मखुसे नेपालभाषा साहित्ययात नं नेवाःइतर ब्वँमिपिनि दथुइ थ्यंके बियादिल । थथे सफूया अनुवाद बाहेक भाजु अणुराजं सत्यमोहन जोशी विषयय् अध्ययन अनुसन्धान याइपिंत ज्याय् ख्यलय् जुइगु शताव्दी पुरुष नाप स्वापू दुगु न्हून्हूगु खँ, मां राधादेवी जोशी लुमंकाः आदि थेंज्याःगु च्वसु नं पत्रपत्रिकाय् पिकयादीगु दु ।

बा आशारत्नमुनि बज्राचार्य व मां हेराकुमारी बज्राचार्यया कोखं च्वखं च्वमि अनार बजाचार्यया जन्म ने.सं. १०७३ (वि. सं. २०१० आश्विन ) य् येँया झ्वाःबहाः त्वालय् जूगु खः । वय्‌कःया पूवंगु नां अनाररत्न बज्राचार्य खः । जनप्रशासनय् स्नातक व एम. पि.एच. ब्वनेज्या क्वचायेकादीम्ह भाजु बज्राचार्यया नेपालभाषा साहित्य ख्यलय् न्हापांगु कृति जीवनया दुःख हे सुखया सम्पत्ति च्वखँ बु.सं. २५१८ बैशाख पूर्णिमा पतिइ पिदंगु खः । सामाजिक, सांस्कृतिक, अनुसन्धान, सूचनामूलक व जीवनी यानाः थीथी विधापाखे च्वसा न्ह्याकादीम्ह वय्‌कःया नेपालभाषा लिसें खस भाषाय् नं उतिकं च्वसा न्ह्याः ।

नेपालभाषा साहित्य ख्यलय् च्वखं पाखें पलाः न्ह्याकादीगु खःसां लिपा वय्‌कलं ख्यालः व प्याखंपाखे थःगु नुगः क्वासायेकादिल । नेपालभाषाया ख्यालः व प्याखं ख्यलय् मूजः खलः भोटेबहाःपाखें थःगु कला न्ह्यब्वयाझाःम्ह बज्राचार्यं मुनासःया ग्वसालय् जूगु प्याखं धेंधेंबल्लाखय् सीम्ह मनूया जिलाजं प्याखनय् बुराम्ह मनूया भूमिकाय् अभिनय यानाः उत्कृष्ट कलाकारया सिरपाः त्याकादीगु खः । थुकथं भाजु अनार बजाचार्यं अभिनयया क्षेत्रय् थीथी प्याखं म्हितादीगु दु । फ्वगिंया ख्वापाः (ने.सं. १०९६), स्वाः पुचःया ग्वसालय् जूगु छधाःप्याखं नसंफाःपिं झी जनतातय् थःगु अभिनय ब्वयाः न्हाप व लियांल्यू सिरपाः त्याकेत ताःलाःगु खः । बज्राचार्यया कुलय् बूम्ह जूगुलिं थःगु पूर्खां त्वताथकूगु प्रतिस्था ल्यंकातयेत परम्परां निसें न्ह्यानावयाच्वंगु जजमानी ज्याय् बज्राचार्यतय्‌त छधीछप्पँ यायेत पलिस्था जूगु बज्राचार्य समन्वय परिषद् (२०५८) या संस्थापक नायः जुयादीम्ह वय्‌कः छम्ह भाषिक अभियन्ता नापनापं सामाजिक व सांस्कृतिक अभियन्ता नं खः । नेपाःया बहाःबहिया मौलिकता ल्यंकाः नेवाः सांस्कृतिक सम्पदायात संरक्षण व सम्बद्र्धन यायेमाः धयागु भावना दुम्ह वय्‌कः रत्नकेतु महाविहार (झ्वाःबहाः ) संरक्षण समितिया संस्थापक नायः नं खः ।

वय्‌कलं नेवाः भाय, नेवाः संस्कृति, सभ्यता हलिंन्यंक प्रचार प्रसारया लागि सन् २००४ अगष्टय् नेवार समाज हङकङया पलिस्था यानाः दकलय् न्हापांखुसी नेवाः मन्दः च्वयाः हङ्गकङ्गय् नेवाः संस्कार कथं म्हपुजा न्ह्याकूगु खः । हलिं नेवाः दबू पलिस्थाया झ्वलय् पासापुचः गुथि युकेया ग्वसालय् बेलायतय् सन् २०११ अक्टोबरय् जूगु न्हापांगु सम्मेलनय् सहभागी जुयादीम्ह वय्‌कलं बज्राचार्य समाज थपू व आचार्य गुथि थातं तयेत येँ देय्‌या आचाःगु संरक्षण गुथिं न्ह्याकूगु न्हापांगु साहित्य गोष्ठी धेंधेंबल्ला कासाय् झीगु आचार्य गुथिया प्रचलन व थुकिया आवश्यक्ता नांगु अनुसन्धानात्मक च्वसु च्वयाः ल्यू सिरपाः त्याकादीगु खः । थुकथं बज्राचार्य समाजया न्ह्यलुवाः भाजु बज्राचार्यं आपाः धयाथें बज्राचार्य समाज व बौद्धधर्मनाप स्वापू दुगु थीथी च्वसुत च्वयाः थीथी पत्रिकाय् पिथनादीगु दु ।

नेपालभाषा मंकाः खलः व नेवाः देय् दबूया संस्थापक दुजः भाजु बज्राचार्यं सन् २०१६–२०२१ तक हलिं नेवाः दबुलिइ नेपाःपाखेया सचिव जुयाः नं ज्या यानादीगु खः । बज्राचार्य समाजय् ब्वलंम्ह जूगुलिं वय्‌कलं ने.सं. १११९ य् बुद्ध जयन्तिया लसताय् जय नमः श्री भगवान बुद्ध लुम्बिनी वनस बिज्याक म्येय् न्ह्यथनातःथें वकथं हे पात्रत दयेकाः जीवन्त झाँकि देय् चाःहिकादीगु खः ।

थुलि जक मखु वय्‌कलं नेपाः देय्‌या सकल बज्राचार्य खलःत थवंथः स्वापू तयाः ज्याखँ याये अःपुकेत ने.सं. १११९ य् सकल बज्राचार्यपिनिगु नां दुथ्याकाः बज्राचार्य टेलिफोन डायरी पिथनादीगु दु ।