स्वनिगलं पिनें पिदंपिं नेपालभाषाया भाषिक अभियन्तापिं मध्ये भाजु कृष्णबहादुर शाही नं छम्ह खः । वय्कःया जन्म बि.सं.१९८९ भाद्र २८ गते येँय् डिल्लीबजारय् जूगु खः । लिपा वय्कः धरानय् वनाः सिँज्या यानादिल । वय्कः धरानय् नेपालभाषाया प्रचार प्रसार यायेगु ज्याया नापं चित्रकला व संगीतया क्षेत्रय् नं सक्रिय जुयादिल । वय्कलं धरानय् सरस्वति बाल अनाथ आश्रम चायेकादिल । उकिया सम्बद्र्धनय् न्ह्यचिलादिल । वय्कः २०६६ असारय् दिवंगत जुयादिल ।
स्वनिगलं पिनें पिदंपिं नेपालभाषाया भाषिक सांस्कृतिक अभियन्तापिं मध्ये भाजु कृष्णबहादुर श्रेष्ठ नं छम्ह खः । वय्कःया जन्म बि.सं.२००७ कार्तिक २१ गते खः । कास्की जिल्लाय् नेवाः भाय् व नेवाः संस्कृतिया निंतिं छुं यायेमाः धयागु वय्कःया धारणा खः । थुकिया नितिं वय्कलं कास्की जिल्लाय् झीगु भाय् झीगु संस्कृति नांगु संस्था नीस्वनाः अनया नेवाः युवातय्त न्ह्यज्याकेगु ज्या न्ह्याकादिल ।