नेवाःत च्वनावयाच्वंगु स्वनिगः प्राकृतिक रुपं उलि तांन्वः नं मजू, चिकुयाः च्वापु धीचिनी कथं नं मखु । याउँक अले न्ह्याइपुक च्वनेत ल्वःगु थुगु
थाय्या लःफय् खः । प्राग् ऐतिहासिक इलय् पुखूया लः सुनावनाः न्यंकभनं जैविक अवशेषत दुगुलिं थनया बुँ अतिकं बांलाः, बालिनाली गाक्कं सः । मनूतय् निंतिं थुगु थाय् थातं च्वनेत ल्वःवनीगु जुल । थ्वहे कारणं थीथी इलय् गुलिखे मनूत उत्तर हिमाल पारीं स्वनिगलय् कुहाँ वल । अथे हे दक्षिणपाखें नं तःक्वः हे तःगू लागाया मनूत स्वनिगलय् थ्यंकः वल । थ्व ल्याखं नेपालमण्डल दुने मंगोल नश्लया मनूत नं उलि हे दु, अले दक्षिणं दुहां वःपिं आर्यत नं दु । उलि जक मखु उत्तर पूर्वीय लागां थाय्बाय् हिलाः हिलाः थ्यंकः वःपिं किराती मूलया मनूत नं स्वनिगलय् थ्यन । तर छगू विशेषता, गुलि नं पिनें स्वनिगः दुने दुहाँ वल कालक्रमय् उपिं सकलया मंकाः म्हसीका नेवाः जुल । थुकथं नेवाः नश्लगत ल्याखं थीथी वर्ण, रंग, रुपया समिश्रण कथं विकसित जुया बिल । नश्लगत ल्याखं नेवाः बहुलतायुक्त खत ।