नेपाःया थीथी आदिवासी समुदायत मध्ये थःगु हे मौलिक भाय् ल्हाइपिं नेवाः छगू मू समुदाय खत । थुगु भाय्या लेख्य परम्परा गाक्कं पुलां । सिर्जनात्मक लेख्य परम्पराया इतिहास थ्यंमथ्यं खुसःदँ न्ह्यवया दसि लुयावःगु दु । नेपालय् जक मखु दक्षिण एसिया दुने हे सँय्–बर्मेली खलःया भाय्या पुचलय् थःगु हे लिपि दुगु भाय् मुक्कं न्यागू जक दु । उकी मध्ये छगू नेवाः भाय् खः । नेवाः भाय्या रञ्जना लिपियात संसारय् दुगु लिपित मध्ये छगू आकर्षक व कलात्मक लिपि कथं नालातःगु दु । अथे हे प्रचलित, भुजिंम्वल, लितुम्वल, पाचुम्वल, कुंम्वल आदि नेपालभाषाया लिपित खः ।
